News

Vawiin (17.12.2025) hian Chief Secretary Khilli Ram Meena chuan Lunglei tlawhin, sawrkar pisa hotu (head of office)-te nen DC Conference Hall-ah an inkawm.

Chief Secretary sawrkar laipui duh dan anga ram mipuite mamawh ngaihtuahna leh hmasawnna hna thawh hrang hrangah tih tur hlen chhuah (saturate) a nih theih nan ruahmanna kimchang leh felfai tak a awm a ṭul thu sawiin, department hrang hrangte chu an hna thawhna turah leh mipui rawng an bawlna kawngah ruahmanna fel tak siam turin a chah.

Khilli Ram Meena chuan DAJGUA hnuaia scheme 17 kal tlanga hmasawnna tluantling a awm theih nana hma laknaah pawh mamawh bulpui hmasa pahnih – inkal pawhna kawngpui ṭha leh inbiak pawhna internet ṭha a awm theih nana ruahmanna siam a, hma la turin district thuneitute chu a chah a, “Khaw tin leh mi tin thleng phak ruahmanna leh hmasawnna a awm a pawimawh,” a ti.

Hriselna, zirna leh nun khaw chhuahna atana khua leh tuite mamawh hrang hrang a nih dan tur tak leh a hun taka pe thei turin department hrang hrang chu theihtawp chhuah tura chahin Chief Secretary chuan, ruahmanna fel tak a awm chuan sawrkar hma lakna hrang hrangah hmasawnna tluantling leh hlawhtling zawk a awm theih tur thu a sawi.

Lunglei DC Navneet Mann chuan Lunglei District dinhmun tlangpui leh district chhunga sawrkar hma lakna langsar zual a tarlang.