News

Mizoram Police chuan thuchhuah siamin, YouTube channel thenkhatah mipat hmeichhiatna lam hawi thawnthu ngialngan tak tak chhiar chhuah thin a nih thu an dawn bawhzuiin, Cyber Crime Police
Station chuan a chhuizui nghal tih tarlangin, “YouTube channel pahnih,
“@NGAITHLASUHPUITLINGHUANG (PUITLUNG HUANG)” leh
“@puitlinghuangzz (NAUPANGTIAMLOH)” te chuan Mizo tawngin hetiang thawnthu phuahchawp chhiar chhuahna video tam tak an upload tih hmuh chhuah a ni,” an ti.

Mizoram Police tarlan danin, heng video-te hi mipui en theih tura chhawpchhuah an ni a, mipuite rilru hruai khaw loin, a bik takin naupangte rilru a tihbuai theih avangin heng an thiltihte hi Bharatiya Nyaya Sanhita, 2023 leh Information Technology Act, 2000 hnuaia hrem theih a ni. Cyber Crime Police Station chuan Case No.16/26 dt. 26.04.2026 u/s 294 BNS r/w 67 IT Act 2000 chu register nghalin, investigation pawh rang takin a kalpui nghal a ni.

YouTube puihna leh Investigating Officer-in technical investigation a tihte kaltlangin, account neitute chu ni 14.05.2026 khan hriatchhuah an ni.
Youtube account @NGAITHLASUHPUITLINGHUANG tih chu Henry Lalrinpuia (29) s/o Lalhmangaiha, Hunthar, Aizawl siam leh khawih niin
@puitlinghuangzz tih chu Vanlalhmangaihzuala (35) s/o Vanlalhunga(L),
Chaltui, Phuldungsei siam leh khawih a ni thung. Police hmalaknain an video-te mipui en theih lova dah a ni a, pawikhawih tute hi dan hnuaia hrem turin man an niin an mobile phone hman laite chu evidence atan mansak an ni.

Henry Lalrinpuia (29) S/o Lalhmangaiha, Hunthar, Aizawl hi ni 15.5.2026 ah man niin, Vanlalhmangaihzuala (35) S/o Vanlalhunga(L), Chaltui, Phuldungsei chu ni 16.5.2026 ah man a ni thung.

Mizoram Police chuan social media leh online platform dangah te hetiang mipat hmeichhiatna lam hawi thlalak, video leh thawnthute thehdarh chu dan kalh a ni tin hre turin mipuite a chah nawn leh. Social media hmanga dan bawhchhiate chungah na takin Mizoram Police chuan action a la zel dawn a ni.
I