CYMA-in ambulance an sem chhuak

Tukin (14.4.2026) khan Reliance Foundation-in Formosa Foundation, India kaltlanga Central YMA hnena ambulance an hlante chu a dawng tura thlante hnenah sem chhuah a ni.

Ambulance sem chhuah inkhawmah Central YMA President R Lalngheta chuan tanpui ngaite tanpui nan leh ruihhlo dona kawnga hmanraw tangkai tak tur Reliance Foundation-ten Formosa Foundation kaltlanga an rawn pe thin chu lawmawm a tih thu a sawi.

CYMA President chuan YMA laka hmuhdan dik lo nei thinte chhangin, “Mi thenkhatin YMA hi lei theih ang hiala min chhuah thin an awm a mah se, YMA hi lei theih kan ni lo tih kan hriat tlan a tul a ni,” a ti.

Formosa Foundation chungchanga chirh theh rawn awm thinte chu an tum an hriatchian thu sawiin R Lalngheta chuan, “An hmalaknaah YMA chu an bulah a ding tlat dawn,” tiin a sawi.

CYMA President chuan Mizoram zimtea hnam bil anga inthendarh hi YMA chuan a remti lo tih lantir nan he ambulance semnaah hian YLA leh MTP-te pawh huang khatah an awm vek thu pawh a sawi.

Ambulance tukina CYMA-in an pekte chu – YMA Zobawk Group, YMA Chawngte Group, YMA Pangzawl Group, MTP Sub-Hqrs, Tipa V leh YLA Sub-Hqrs, Sangau an ni.