News

Central YMA chuan thuchhuah siamin, ni 13.05.2026 (Nilaini)-a Manipur Kangpokpi District-a Kotzim leh Kotlen inkara Thadou Baptist Association (TBA) Kohhran hruaitute Churachanpur-a inkhawmpui hmang haw lam chuanna motor lambuna mi pathum – Rev. Dr. Vumthang Sitlhou, Pastor Kaigoulun Lhouvum leh Pastor Paogoulen Sitlhou-te kahhlum an ni leh midang pali an hliam hi pawi an ti tak zet tih an tarlang.

Mi pawisawi lo leh sakhaw hruaitute kahhlum an ni chu pawi an tiin an dem takzet tih tarlangin CYMA chuan, “He thil thlenga mawhphurtute pawhin an phu ang tawk hremna an hmuh ngei theih nan Sawrkar Laipui pawh hma la turin an ngen. He thil thleng hian Manipur-a Zofate himna nasa taka a khawih avangin hriathiam har kan ti a, Zofate leh hnam hrang hrang inkara remna leh muanna awm hi kan duh tak meuh a ni. He thil thlenga thihna tawkte kan sun a, an chhungte kan tuarpui takzet a ni. Hliamte pawh dam leh thuai turin duhsakna kan hlan e,” an ti.