Nov 17, 2025
Monday
Vawiin (17.11.2025) tlai dar 3:00 khan Central YMA Office ah Central YMA OB te leh Aizawl City Local Council Association hruaitute an inkawm a, CYMA President R. Lalngheta’n a kaihruai.
Inkawmhonaah hian thil chi hrang hrang sawiho a ni a : ILP chungchang te, dan loa hnamdang sumdawng tam ta lutuk te, Aizawl khawpui chhung kawng siam mek en zui chungchang te, ruihhlo do chungchang te, ruihhlo do chungchangah YMA leh Local Council-te tanho a tul zia te, YMA leh LC ten hriatpuina lehkha leh NoC pek chhuah chungchangah fimkhur taka kal pui a tul thute sawiho a ni.
ACLCA President C Lalbiaknunga chuan YMA-in ruihhlo do kawnga khawtlang tana tha tura an ngaih chu Local Council-in lo dodal loh a that tur thu a sawi.
CYMA President chuan ruihhlo do kawngah chak takin hma lak a tum thu sawiin, an tawiawmna an mamawh dawn tih LC hruaitute hi a hrilh.
