News

Vawiin (6.12.2025) chhun khan Central YMA leh PWD hotuten PMGSY hnuaia Hlimen leh Lungleng inkar kawng siam mek an enfiah.
Central YMA atangin R. Lalngheta President leh CEC member 14 an kal a, PWD atangin a bialtu EE leh JE te an kal.

CYMA tarlan danin, PMGSY hnuaia helai kawng siam hnathawk mektu contractor-te hian hna an thawk muang nia hriat a nih avangin kawng hi an en a, contractor te chu chak zawk a thawk turin an ngen.

Central YMA President chuan, “YMA chuan thil ṭha kan duh a, chak tak si, ṭha tak si a thawh hi kan duh a ni. Helai hnathawk tute pawh Mizo tho in nih avangin kan ram tan theihtawp chhuah ve ula kan duh. In thawk ṭha duh dawn lo emaw, in thawk ṭha thei dawn lo a nih chuan, midangin thawk mai rawh se tih hi YMA chuan kan tih thiam ve dan a ni mai ang” tiin contractor-te a fuih.

Kawng enfiahnaah hian Samtlang, Lungleng North leh Lungleng-I Branch hruaituten an lo tawiawm.