News

Vawiin (11.8.2026) chawhma dar 10:30 khan Mizoram Tourism Department leh Central YMA-te chuan Tourism Minister Lalnghinglova Hmar office-ah thawhhona thuthlung (memorandum of understanding) an ziak. Tourism Secretary Vanlaldina Fanai chuan Tourism Department aiawhin hming a ziak a, Central YMA aiawhin President R Lalngheta’n hming a ziak a ni.

Tourism Minister chuan tourism chungchangah Central YMA leh Tourism Department-ten thawhhona thuthlung an ziak thei chu lawmawm a ti takzet tih sawiin, “Tun hnaiah kan state-ah tourist an lo lut nasa a, heti lama kan hmalaknate leh kan hmachhawp awmte pawh a thahnem tham hle. Infrastructure leh thil dangah hmalakna hrang hrang awm mah se, a tak taka kan buaipui tur chu mihring an ni a, khualzin an tam zel avangin department chauhin a dawl zawh rual a ni lo. YMA-te nen kan tanrual hi a ngai a ni,” a ti a.

Tourism Department hi tunah department lian lo tak ni mah se, potential tha tak an nei tih sawiin Lalnghinglova Hmar chuan, “Tun atanga kum rei lo teah chuan department lian, sum thawhchhuah lamah pawh a lian zingah a tel thei ngei ang,” tiin hma an sawn zel thu a sawi.

Central YMA President pawhin theihtawp an chhuah tur thu sawiin, YMA leh Tourism Department thawhona chuan rah ṭha a chhuah ngei a beisei thu a sawi a ni.

Thawhhona thuthlung ziahnaah hian Tourism Department lam hotute leh Central YMA hotute an tel a ni.