Dan loa pension lak inhrilhriatna buatsaih

Vawiin (14.8.2026) chhun khan Aizawl District Treasury chuan kohhran hrang hrangte tan Assembly Annexe conference hall-ah dan lova pension/family pension lâk tih reh dan tur chungchang inhrilhhriatna hun an buatsaih a, kohhran 34 aiawh an tel.

He hunah hian resource person Malsawmdawngliani (Director, Local Fund Audit & Pension, A&T) chuan dan ang taka pension lak theihdan leh chumi hrul chiaha dan lo va pension/family pension lak awm thinte chu case-study hmangin a tarlang a, mahni duhthu ngeia in surrender-te chu sawrkarin a ngaihhnathiam tur thu leh, pawisa rulhtir an nih dawn loh thu a sawi.

September 2026 hnu lamah chuan ngaihhnathiamna awm tawh loin, court lamah dan hmangin BNS emaw BNSS hnuaiah thubuai rip tak siamsak an nih tur thu sawiin Malsawmdawngliana chuan, “Pawisa chawi bakah jail tan thlengin dan hnuaiah hmalak a ni tawh dawn,” a ti a, dan lova family pension la mekte chu in surrender turin a ngen.

Dan loa pension/family pension lak chungchanga kohhran, village/local council leh YMA bâkah sorkar department hrang hrangte mawhphurhna pawimawhzia sawiho niin, Treasury hotute chuan kohhran hruaitute chu, an mi leh sâte dinhmun (nupui/pasal neih emaw pian/thih ni leh eizawnna thu ah te) sorkara thehluh tur hriatpuina lehkha diktak chauh pe chhuak hram turin an ngen.

Kohhran hrang hrang aiawh kahlhawmte chuan an theih ang anga sorkar an thawhpui tur thu an sawi hlawm a ni.

CCS (Pension) Rules, 1972-in a tarlan ang chuan, a hnuaia mite hian family pension an la thei tawh lo:

1.Family pension la mekin nupui/pasal a neih leh chuan family pension a la thei tawh lo.
2.Sawrkar hnathawk fa hrin ni lo emaw, dan ang taka fa lak ni lo, birth certificate lem siama family pension la te.
3.Sawrkar hnathawk ni reng si, mahni nu emaw pa emaw fate emaw family pension la te.
4.Pensioner ni reng si, mahni nu emaw pa emaw fate family pension la te.
5.Pasal nei reng chung si, pasal neilo anga in ziah a, nu/pa emaw pasal a sûn tâkte family pension la te.
6.Family pension lâk duh avanga mahni nu leh pate thih ni emaw, pasal te thih ni / inthen ni tidanglama family pension la te.
7.Thla khata pawisa lâkluh zawng zawng belhkhawm a, monthly minimum pension @ Rs. 8,700 plus DR income nei pha, tun dinhmunah chuan Rs. 12,702 la tling te.