News

MNF President Zoramthanga chuan vawiin (6.8.2026) hian an office-ah press conference koin Govt. Mizoram Law College zirlaite hmaa ni 31.7.2026-a Chief Minister Lalduhoma thusawiah khan Mizoram leh Mizo hnam himna khawih thil, thu dik lo hmanga thalai rilru thianghlimte hruai kawi tumna leh hnam pawikhawihna thuk tak a awm avangin MNF chuan pawi an ti hle tih sawiin, “Mizoten inhumhimna kan neihte huai taka tantu leh venghimtu tur anih laia a sawi derthawngtua a tang fo mai hi thil pawi em em, state khat hotulu ber tan chuan tih hauh loh turah kan ngai a ni,” a ti.

Politics-ah thu inchuh leh inhnialna awm fo thin mahse, hruaitu chinte chu ram leh hnam himna khawih thilah chuan dinna nghet tak nei tura beisei an nih thu sawiin MNF President chuan, “Mizo mipuiten harsatna tam tak paltlanga kan hlawh chhuah, hnam lian zawkte min chimral theihna laka invehimna tha tak kan neih mekte hian pawn lam atanga beih leh nek a lo tawk anih pawhin huaisen taka dolet tura beisei kan ni. Chutianga pawn lam atanga nekna leh nawrna pawh a awm hma hauha ILP kan hman mekte pawh ‘Central Sorkarin a duh chuan min paihsak thei’ tih Pu Lalduhoma’n a sawi fo mai hi ‘dawih aw’ dik tak a ni a, CentralSorkar hian min paihsak lo tum tak tak ta se, a dodal ngam dawn lo tihna a ni,” tiin hetianga ‘dawih aw’ chhuah sa reng ringawttu hi ram hruaitu ni zel tlak a ni em tih hi Zoram mipui leh thalai rualte hian an uluk taka ngaihtuah a ngaih thu a sawi.

Zoramthanga chuan British hunlai atanga inhumhimna kan lo neih, ILP leh a lo pianna, BEFR 1873 hi harsatna chi hrang hrang kara Mizo mipuiten kan la venhim chhoh zel a nih thu sawiin, “Hei hi Mizote chimrala kan awm lohna tura min duansak a ni. Central Sorkar, Mizoram Sorkar leh MNF ten inremna thuthlung, Memorandum of Settlement (MoS) kan ziah hmang khan ‘Mizoram Sorkar rawn lo chuan tih danglam emaw, hlih emaw a ni lovang’ tih chiang taka tarlangin, MoS hmang hian Inner Line Regulation kan hman mek chu nemngheh leh zual a lo ni ta a ni. Hetiang hi thil awmdan dik zawk anih laiin Pu Lalduhoma’n inremna thuthlung thlenga sawi bawrhban a tum mai kha a pawi hle,” a ti.

MNF President chuan inremna ziah kawngah a hrechiang ber leh a thawh hlawk ber anga inchhal chung siin, Law College zirlaite hmaah khan peace accord tia sawi thin, inremna kha ‘Memorandum of Agreement’ tih leh ‘Memorandum of Understanding’ tiin vawi hnih lai a sawi tih sawiin, “Inremna thuthlung kha ‘Memorandum of Settlement’ a ni zawk a, a hming dik tak pawh a hre fuh lo a, chumai ni lovin, inremna thuthlunga Mizoram sorkar aiawha hming ziaktu, khatih laia Chief Secretary Pu Lalkhama hming pawh a sawi bo der bawk. Pu Lalkhama hian vawiin thlengin min la dampui a, Pu Lalduhoma’n a hming a sawi bo hlauh mai hi amah pawhin mak a ti hle nghe nghe a ni. Hriat loh vanga sawi sual hi chu a hriatthiam theih,” tiin hre reng chung si a, sawi dik loh luih hi chu ram hruaitulu ber tih loh tawp tur a nih thu a sawi.

Mizoramin remna thuthlung kan neih hlu tak, kum 40 lai a rah kawng tamtaka kan seng mek, theihtawpa sawi nep tuma “Mizoram party pakhat leh Home Ministry inremna mai a ni, a ropui teh chiam lo” tiin Lalduhoma’n thu dik lo a sawi tih sawiin MNF President, “Mipuite rilru, kawng dik lova hruai tumna huatthlaawm tak a ni. Inremna thuthlung, Memorandum of Settlement hi khatihlaia Prime Minister te, Home Minister te leh sorkar hotu dangten an pawm vek hnuah India sorkar aiawhin Union Home Secy. RD Pradhan-a’n a hming a ziah hnan a, chutiang bawkin khatih laia Mizoram Sorkar remtihna leh pawmpuinain, Pu Lal Thanhawla, Chief Minister awm ve lai ngeiin Mizoram Chief Secretary Pu Lalkhama’n Mizoram Sorkar aiawhin a hming a ziah hnan bawk,” a ti.

Zoramthanga chuan Zoram mipui, kohhran leh NGO hrang hrang leh political party tinte duhna leh nawrna avangin MNF underground sorkar hotu, MNF President Laldenga’n a hming a ziah hnan bawk tih sawiin, “Chu inremna chu India Parliament-in a taka kalpui nghalin, 53rd Amendment Act, 1986 hmangin Article 371-G chu India Constitution-ah ziahluh nghal a ni ta bawk. Engtikawng mahin Home Ministry leh MNF inremna mai a ni lo tih hi sawifiah nawn pawh ngai lo a nih laiin, Pu Lalduhoma hian dik lo taka Mizo history pholan a tum avangin vawiinah hian thu dik sawi nawn leh a ngai ta hi thil vanduaithlak tak a ni. Kan Chief Minister hian remna thuthlung hi Mizo National Union (MNU) President a nih laiin, ‘inremna zawnga inremna chhe ber, satah chhuak pek pawh tluk lo’ tiin a sawi,” tiin Zoram Nationalist Party President a nih lai chuan inremna thuthlung hi a kutchhuak ang hiala sawiin, a bung leh chang tinah a kuthnu a tel thu a sawi leh thung thu a sawi.

MNF President chuan Lalduhoma’n tunah chuan a nep thei ang berin kan inhumhimna bang chu sawi nghingin, duh hun huna Central Sorkarin a thiah theih niin a sawi leh thung tih sawiin, “Hetiang taka dinhmum mumal lo leh chiang lo Chief Minister kan nei hi thangtharte leh Mizo Mipuite tan a vanduaithlak tak zet a ni. Remna thuthlung duan hunlaia kutthlaktu thenkhat chu boral tawh mahse, remna kawng zawh chhoh dan a kip a kawi hretu leh kawng engkima Pu Laldenga bula tap chawt Pu Tawnluia a la dam Hetihlaia Pu Lalduhoma’n remna thuthlung buatsaihnaa a kip a kawia buaipuitu ber leh thawktu ber ang leh phusa ber anga a insawi fo te pawh thudik hretu Pu Tawnluia a la dam hi Zoram mipuite tan a vanneihthlak hle a ni,” a ti.

Zoramthanga chuan Chief Minister thusawi chu hnam pawikhawihna leh hnam himna tiderthawngtu a nih avangin mipuite hnenah ngaihdam dil ngei tur leh August 15, 2026 hmaa sut ngei tura an phut thu sawiin, “Mizo mipuite hnena ngaihdam dila a thusawi hi a sut lo anih chuan a tul anga hmalak chhunzawm zel kan tum a, kan remna thuthlung hi MNF chuan vawnhim reng kan tum,” tiin remna thuthlung tibawrhbang tur leh kan himna tichhe zawnga chetna reng reng chu a tawp thlenga an do tlat dawn thu a sawi.