Dawrpui Veng tawlh an tum lo

Dawrpui Khawtlang Hruaitute Joint Committee chuan vawiin (23.6.2026) hian Aizawl Press Club-ah press conference neiin, Chhinga Veng nen an ramri chungchangah tharum ni loin dan hmanga hma an lak zel tur thu sawiin, “Sorkarin kan veng area chin gazetted a chhuahah inches khat pawh kan tawlh dawn lo,” an ti.

Dawrpui Joint Committee chuan June 16, 2026 (Thawhlehni) zinga Dawrpui Veng chhungah ngeia ‘Chhinga Veng Thalai Pawl’ inti te’n Dawrpui mipui zahpah hauh loin, poster an tar khum tih sawiin, “Aurinna hmanga veng mipui min rawn cho-in, an Y.M.A section khat lek pawh ngam lo tur khawpa min rawn aukhum ngam mai kha mak kan ti hle. Dawrpui area-a dawr an rawn kalh sak ngam ngat mai phei hi chu dan bawhchhiatna dik tak niin kan ngai. He buaina avanga hemi ni veka Pi B. Lalawmpuii, AMC Ward IX Corporator-in keini veng pahnih Local Council ve vete min sawipui tum leh, Aizawl DC kaihhruainaa kan sawihonaah pawh an khawtlang hruaitute hian he pawl ‘Chhinga Veng Thalai Pawl’ te hmalakna hi an hriatpui loh thu an sawi ngei a ni. Chutih mek laiin a hnu lawkah an khawtlang Joint Committee chuan he pawl hmalakna hi an thlawp thu an rawn chhuah leh site hi a mak kan ti lehzual hle. He pawlin kan veng chhung ngeia hetianga dan pawisa lova hma an rawn la ta mai hi mak kan tiin kan dem tak zet a, eng thuneihna nge an neih tih kan zawt a ni,” an ti.

June 16 vek hian Dawrpui Thlanmual (Pass DLL-62 of 1990) Centenary Signboard an la thla bawk tih sawiin Dawrpui Joint Committee chuan, “Dawrpui Thlanmual hi veng paruk Dawrpui, Saron Veng, Tuithiang, Armed Veng, Armed Veng South leh Chhinga Veng tena kan dinho ‘Dawrpui Thlanmual Committee’ enkawlna hnuaia awm a ni. A hming ‘Dawrpui Thlanmual’ tih pawh hi he committee-in lungrual taka kan pawm a ni. Hetianga veng paruk ințawm thlanmual meuh pawh zah lo taka an suasam ta mai hi dan bawhchhiatna lian tak a ni,” tiin thlanmual eenkawitu committee pawh an zahloh hle tih a lang a, an dem takzet tih an tarlang.

Dawrpui Joint Committee sawi danin, Chhinga Vengin buaina an siamna lai hi Dawrpui area a ni. Sawrkarin khua leh veng ramri a siam Dawrpui ramri tarlanna Gazette Vol XXIII Aizawl, Friday 29.04.1994, Vaisakha 9, S.E 1916 Issue no. 59-ah Dawrpui area a ni tih chiang takin a lang. Tin, Chhinga Veng ramri tarlanna Gazette Vol X Aizawl Friday, 22.01.1982 Magha 2, S.E 1903 Issue No.6-ah hian Chhinga Veng area a ni lo tih chiang takin a lang bawk a ni. Ni 17 June 2026-a AMC Mayor kaihhruaina hnuaia veng pahnih hruaitute inkawmhonaah pawh keini Dawrpui Veng aiawha telte chuan, heti taka kan laka an chet dan rawva lutuk hian an rilru tina hle chungin dan hnuaiah veng pahnihte hi inrem dan kawng zawn a tha e an ti a ni. He meeting-ah hian Chhinga Veng aiawha telte chuan “Gazette kan pawm lo” an ti leh zel phei hi chu sawrkar thuchhuak zah lohnaah an ngai a, buai chhunzawm zel an pawi ti loah an ngai a ni.

Hetiang taka Dawrpui Khawtlang chunga Chhinga Veng Thalaite chet dan hian Dawrpui Veng mipuite min zah loin an rilru a ti na takzet. Ram hruaitute’n inremna beiseia an ngenna avang chauhin an insum hram hram a ni. Amaherawhchu, Chhinga Veng lam hian an thil tih chhiatte siam tha leh a, an ram china signboard an rawn tarte lak thlak an tum tak loah chuan inrem an duh lo angah an ngai. A tul angin Dawrpui khawtlang chuan dan angin hma kan la zel dawn. Sawrkarin Dawrpui Veng chin a siam Gazette hi inches khat pawhin an tawlh dawn lo. Sorkarin 1994 Gazette a chhuaha Dawrpui ram chin a siamah hian awm an duh ber. Veng thenawmte nen hian dan hnuaiah inrem taka awm hi an duh ber reng chu a ni.