News

ZPM Vice President C Lalnunnema chuan ZPM-in office hmun lei an tum chungchang leh Assam Rifles Biak In hmun sawi zawm a nih chungchang a sawifiah a, dawt sawi sim thei loah eptute a puh.

C Lalnunnema chuan eptu party-te’n an rilru chhiat vangin ZPM tih mualpho an tum thu sawiin, “Hman atanga politics hri tha lo an vei kha opposition-te hian an la vei reng a, an hri vei dawt sawi hi an sim thei lo a nih hi maw. Keini’n politics khelh dan thianghlim leh tha zawk kan zirtir mek laiin a dik lo zawk, dawt hmanga inbeihna a la awm reng mai hi a khamawm ta hle a ni,” a ti.

ZPM Vice President sawi tlangpui :

Assam Rifles Bn. ram chhuahsan hman tangkai dan turah ruahmanna siamtu, ‘Advisory Committee’-ah ZPM Party aiawh turin President-in min ruat. He Committee-ah hian member kan thahnem khawp mai. political party hrang hrang aiawh leh Mizorama NGO pawl hrang hrang aiawh pawl 15 zet kan tel a ni. AR Bn. ram chhuahsan hman dan tur hi Mizoram tan thil pawimawh a nih avanginLalduhoma kaihhruai Mizoram Sawrkar hian uluk takin a ngaihtuah a, mipui duh dan ang taka thutlukna a awm theih nan, a huapzo thei ang berin Advisory Committee hi a din a ni.

AR ram chhuahsan chhungah mimal leh pawl ho ram neite chu sawrkarah surrender tura ngen an ni. Kum 2011 atanga biak in hmun atana land lease nei, Mizoram Synod pawh hi ngen zingah an tel a ni. Biak in hmun hi Central YMA-in court-a a khin zingah tel anga report a awm avangin pawl emaw, mimal emaw pass nei, court-a khin mekte chu Advisory Committee chuan ‘court thu chhuak ngaihchan ni se,’ a ti. November 18, 2025 a meeting-ah chuan CYMA-in a khin zingah a tel lo nia report a awm avang leh Central YMA-in ziakin Synod hnenah court-a an khin zingah an tel lo ve, tia an hrilh avangin Advisory Committee chuan court thu kal lai mek zingah a tel loh chuan land lease neitu Mizoram Synod kuta hlan a rem ti a ni.

ZPM Party hian Assam Rifles Bn. ram chhuahsan chhunga biak in hmun hi party office atana neih tumna emaw, AR ram chhuahsan hman tangkai dan tur chungchangah emaw hian, ngaih dan emaw, duh dan emaw an sawi ngai lo. Sawrkarin mipui aiawh zo tura a din, pawl hrang hrang aiawh telna Advisory Committee ngaihdan leh ruahmanna chu Mizoram mipui tana tha tawkah an ngaih avangin an inrawlh ngai lo . Assam Rifles Biak In hmun chungchang hi ZPM Party te hian party Office hmun atana neih tum anga an puhna hi dawt a ni. Zaa zain thudik lo a ni.