Dawtin inbei lo ang u &#8211; Tetea Hmar

ZPM Thalai buatsaihin vawiin (3.11.2025) chhun khan Dampa Bial chhung Kanghmun, Lungphun, Khawrihnim, W Lungdar, Rulpuihlim, Khawrihnim leh Chungtlangah vantlang inkhawm buatsaih a ni a, thusawitu Lalnghinglova Hmar, Minister of State chuan dawt phuahchawp hmanga inbeih tha a tih loh thu a sawi.

Lalnghinglova Hmar chuan biak in chhunga pulpita kan dinpui ngam leh tur politics khel tura politician-te sawmin, ‘Politics-ah chuan inbeihna a awm thin a, chutiangah pawh chuan dawt phuah chawp hmanga in bei loin, thudik hmangin inbei ang u. Tunhnaiah eptu party candidate-te’n Dampa Bial mipuite hnenah an tih theih loh tur an tiam nasa hle. State sawrkar hmanga tih theih tur angte pawh anmahni mimal tih theih angin an tiam nasa a ni,’ a ti.

Vanlalsailova chu Dampa Bial chhung chhuak a nih angin, Dampa Bial pawnlam mite aiin bial chhung a hre chiangin, a hmangaih zawk tih sawiin Lalnghinglova Hmar chuan, ‘ZPM chuan Dampa Bial hi Aspirational District atanga khai chhuah kan tum. Eptu party te erawh chuan opposition bial nih leh bak campaign au hla tak tak an nei lo,’ tiin ZPM chuan Dampa Bial mipuite chu ruling bial ni turin an sawm thu a sawi.