News

Nimin (August 7, 2026) khan Mizoram Handloom & Handicrafts Development Corporation Ltd. (ZOHANDCO) hmalakna a din MadebyMizo Kiosk, 102 Humayunpur, Safdarjung Enclave, New Delhi a mi chu Chief Minister Lalduhoma chuan a hawng.

MadebyMizo Kiosk hi Mizo thilsiam hrang hrang zawrhna dawr a ni a, Ministry of MSME, Government of India hnuaia scheme pakhat RAMP hmang a din a ni. ZOHANDCO chu he scheme-ah hian State Nodal Agency (SNA) niin, he scheme hnuaia component pakhat, Marketing Intervention bikah mawhphurhna a la bawk a ni.

Marketing Intervention hnuaiah hian ZOHANDCO chuan MadebyMizo.com (e-commerce) platform a lo launch tawh bawk. He e-commerce a Mizote siamchhuah bungrua an ziahluhte a taka zawrh chhuah a nih theih nan MadebyMizo Kiosk hi din a ni. New Delhi bakah hian Bengaluru leh Kolkata-ahte din turin ZOHANDCO chuan hmalakna a kalpui mek a ni.

Heng Kiosk atang hian bungrua hralh chhuah an ni ang. Tin, e-commerce atanga online order awmte, Aizawl atanga thawn vek loin, heng kiosk atangte hian an pechhuak thei dawn a ni. MadebyMizo Kiosk 750 sq ft a lian a ni a, a din nan hian cheng nuai 71.41 hman zawh a ni.

Hawnna hun hi Kidang Restaurant, Safdurjung Enclave-ah Chief Minister’s Grand Dinner hmang chhunzawm a ni. He hunah hian Chief Minister chuan, “Mizorama PSU-te chu sorkar tan phurh rit ni thin an ni a, sorkarna an chelh hnuah siamthat hna nasa takin kan thawk. Tunhnai a ZOHANDCO hmasawn dan hian chu chu a lanchian tir hle a ni,” a ti.

Chief Minister hi Rajya Sabha MP K Laltluangkima, Lok Sabha MP Richard Vanlalhmangaiha, Minister of State Prof. Lalnilawma, ZOHANDCO Chairman J.K. Dawngzuala leh official pawimawh tak tak te’n an tawiawm a ni.