Delhi-ah sawhthing sawiho a ni

Nimin (24.11.2025) khan Mizoram Sorkar leh NITI Aayog, Government of India tangkawp chuan Mizoram sawhthing tharchhuah pung chho mek chungchanga inrawnkhawmna leh sawihona ‘Stakeholders Consultation for Mizoram Ginger Produce’ chu Vigyan Bhawan, New Delhi-ah an buatsaih a, Chief Minister Lalduhoma leh NITI Aayog Member Dr. VK Paul chuan an telpui.

He inrawnkhawmna hi Chief Minister, Council of Ministers leh NITI Aayog-te nena duan chhuah a ni a, a thil tum ber chu Mizorama kuthnathawktute tharchhuah sawhthing lei leh hralh kawnga harsatna sut kian dan tur sawihona leh market tha zawk, loneituten an hlawk pui lehzual tur dapchhuah a ni. Hetiang inrawnkhawmna neih vawikhatna nia hriat a ni.

Mizoram chhunga sawhthing sawngbawlna tha zawk neih leh India ram chhung leh khawvel hmun zau zawka sawhthing thawnchhuah dan turte an sawiho a, kuthnathawktu pawl (FPOs), Industry leh sumdawng (entrepreneur) te tana kalphung tha zawk leh sawhthing chin leh hralh kawnga Strategic Action Plan-te pawh an sawi a ni.

Chief Minister chuan, Mizoram chu tunhnai kum hnih vel chhungin India rama sawhthing tharchhuak tam ber pawlah a inhlankai thu sawiin, “Mizoram tharchhuahte hi hmun danga mite aiin a quality pawh a sang deuh zawka hriat a ni. Sawhthing chingtute tan Mizoram sorkar chuan kg khat zelah support price Rs. 50 a pe mek. Kuthnathawktute tanpui duhna thinlung pu, hlawhtlin ngei tum sumdawng (investor) te chu Mizoram sorkarin lawm takin a thawhpuiin a dawngsawng thei reng a ni,” a ti.

Inrawnkhawman hi hun chhawng thuma kalpui a ni a, a chhawng khatna hi a hawnna inkhawm niin NITI Aayog Member Dr. VK Paul, Member, NITI Aayog chuan a kaihruai a, Agriculture Secretary Ramdinliani chuan Mizoram Sawrkar aiawhin presentation a nei. A chhawng hnihnaah he huna tel Industry, FPO leh Academia-te nen Mizorama sawhthing tharchhuah hralhna leh sawngbawl zui kawnga hmasawnna tur leh insumdawn tawnna tur te sawiho a ni. A chhawng thumnaah Mizoram leh central sawrkara mi pawimawh tak tak – Rohit Kumar, Addl Secretary, NITI Aayog, Abhishek Dev, Chairman, APEDA, AP Das Joshi, Secretary, Ministry of Food Processing Industries, Vaidya Rajesh Kotecha, Secretary, Ministry of Ayush, Devesh Chaturvedi, Secretary, Ministry of Agriculture and Farmers Welfare, Lalnghinglova Hmar, Minister, LESDE leh Khilli Ram Meena, Chief Secretary ten thu an sawi thung.

NITI Aayog chuan rawtna hrang hrang an siam a, chungte chu – Mizoram chu Ginger Capital of India tih ni se, sawhthingte chu organic a nih zel theih nan hmalak zui zel ni se, technology sang zawk nena a processing lam kalpui dan kawng zawn ni se tih leh India ram chhung chauh ni loin ram pawna thawn chhuah kawngah pawh hmalak ni se, tih a ni. An rawtnate chu chak taka bawhzui zel turin thutlukna an siam a ni.