News

PRESS STATEMENT

MPCC Spokesperson Dr. Lallianchhunga chuan Aizawl Press Club-ah press conference koin Dampa Bial by-election a an chak loh avang leh LADC inthlana pathumna an nih avangin ZPM Sorkar hnuaiah AMC Election hi a huna buatsaih tumna a awm lo niin a sawi.

Dr. Lallianchhunga chuan AMC election chu tuna AMC term ral hmain buatsaih a nih dawn loh thu leh, AMC election neih hun tur chu kumin (2026) April emaw, May emaw-ah a nih dawn thu an lo hria tih sawiin, “Election kalpui theih loh khawpa harsatna lian tham awm si loa ZPM Sorkar hnuaia AMC inthlan buatsaih a ni lo tur hi Congress Party chuan hriat thiam harsa kan ti. AMC Term dinglai ṭhiat (dissolve) a, AMC enkawltu tur Administrator ruat ngai hiala inthlanna a tikhawtlai hi democracy kalphung palzutnaah kan ngai. Dampa bial by-election a an chak loh avang leh LADC inthlana pathumna an nih avangin ZPM Sorkar hnuaiah AMC election hi a hun taka buatsaih tumna a awm lo sa hrim hrim niin kan ngai bawk a ni,” a ti.

AMC Term kal mek hi March 1, 2026 ah a tawp dawn tih hi a tir aṭanga hriat sa vek a nih thu sawiin MPCC Spokesperson chuan, “Heivang hian March 1, 2026 hmaa AMC election process zawh fel vek a, AMC sorkar thar din hman a nih theihna turin State Election Commission (SEC) pawhin inbuatsaihna a kalpui. Hmeichhe ward tur pawh May 30, 2025 khan a tifel daih tawh a, AMC Final Electoral Roll pawh Jan 7, 2026 khan tar chhuah a ni tawh. AMC inthlan buatsaihna tur leh AMC sorkar thar din a nih theihna atana tih tur ṭul ang ang chu SEC hian a peih vek tawh. Kan hriat angin rorellai ZPM chu Dampa bial by-election leh LADC inthlanah a che chhe hle. Hetiang hi AMC inthlanpuiah pawh a thleng leh thei a ni tih hriain chhuanlam hrang hrang siamin, State Election Commission (SEC) chu AMC inthlan a tihkhawtlai tir tih hi mipui rin dan a ni,” tiin AMC inthlan tihkhawtlaina atana chhuanlam an tarlante hi State sorkarin a chinfel theih vek thil a nih thu a sawi.