DoNER Minister leh CM-in project an hawng

Vawiin (13.5.2026) hian Ministry of DoNER hnuaia cheng vbc. 189. 78 senga kalpui tur Mizoram Ginger Unique Selling Proposition (USP) – Sustainable Cultivation & Value Chain Development Project chu Chief Minister Lalduhoma leh DoNER Minister Jyotiraditya Scindia- ten online-in an hawng.
Chief Minister chuan Mizoram sawhthing chu unique selling proposition (USP) atan Ministry of DoNER-in a pawm tih sawiin, “USP a nih tak avangin cheng vbc. 189. 78 senga kalpui turin he project hi min rawn phalsak ta a ni. Sustainable cultivation atan te, quality control & food safety atan te, farm mechanization & solarisation atante leh post harvest management & processing atante hman a ni ang,” a ti.

Component dangte hi ministry dang scheme-te nena thawkho (convergence) a hmalak tur a ni. Post Harvest Management & Processing bik hi NEC (FDC) atangin gap funding min pe dawn.

Sawhthing chu hmanlai atanga kan pi leh pute lo chin tawh thin thlai, vawiin thlenga cash crop kan chin uar ber zinga mi a nih thu sawiin, “Mizote nuna bet tlat a ni. A quality a tha bik a, a rim a tui a, medicinal value a nei a, a fibre neih a tlem a, oleoresin leh essential oil a ngah. A danglam bik a ni. Mizoten sawhthing chi thum kan chin thin zinga Thingpui leh Thinglaidumte chuan kum 2021 khan GI Tag a hmu a, kum 2025 khan chemicals residue endikna Eurofin Analytical Services, Bengaluru lamin an neih chu tha takin a paltlang tawh. Tun hnaiah USP atan thlan a lo ni leh ta a ni,” a ti.

DoNER Minister pawhin thu sawiin, “India ram puma loneitute inthlunzawma hnathawh hi Prime Minister hmathlir pawimawh tak a ni. Loneitute tihhmasawn hi India hmasawnna ke chheh pawimawh a nih avangin anni chawikang tur hian kawng hrang hrangin sorkar chuan hma a la. He project pawh hi ministry dangte nena tangrualin, loneitute leh society te, state sorkarte nena tangkawpin kan kalpui dawn,” tiin Mizoram sawhthing, tha danglam tak hi zau zawkin an pho chhuah dawn thu a sawi.

Project hi scheme dangte nena convergence-a kalpui tur a ni a. Sustainable Cultivation leh Farm Mechanization te hi Agriculture Department, Horticulture leh Rural Development Department te nena kalpui tur niin; a processing bik hi chu NEC Fund (Focused Development Component) atanga sum hmuh Rs. 30.13 Crore hmanga kalpui a ni ang.

Ruahman dan chuan Mizorama sawhthing thar tam ber district – Champhai District-a Mualkawiah Pilot Project angin a processing hub bulpui ber (main hHub) din a ni ang a, chumi chawmtu turin a chhehvelah unit tenau deuh zawk (spoke hub) Tualcheng, Vaphai leh Zotlangah dah an ni ang. Main Hub hi investor lian zawkte enkawltir a, a tenau pathumte hi Society enkawltir tura ruahman a ni.

Hna hi kumin chhunga thawh zawh hman a, nakkum atanga processing kalpui theih tum a ni.