News

Mizoram Sawrkar hnuaia Education Director hmasa ber Dr. LN Tluanga (93), Mission Veng chu vawiin (31.5.2026) tlai dar 3 vel khan Aizawl Hospital-ah a thi. Mission Veng Presbyterian Kohhran upa niin, naktukah vui a ni ang.

Dr. LN Tluanga hi kum 1933 khan Bukpui khuaah lo piangin, Sialsuk leh Aizawlah te a naupan laiin lehkha a zir a ni. BSc hi Scottish Church College atangin 1955 khan mathematics subject-ah distiction-ah a pass. BSc a pass hnu hian sikulah kum 1 thawkin MSc a zir chhunzawm leh a, a hnu deuh kum 1974 khan Gauhati University hnuaiah PhD zovin Mizo zinga Mathematics subject-a PhD nei hmasa ber a ni.

Mizoram Sawrkar hnuaia Education Director hmasa ber niin, a hnu lamah pawh Education Department hnuaiah vek hian consultant/adviser hna a chelh leh. Science tih hmasawnna kawngah nasa taka thawktu niin Mizoram Science Society pawh hi ama hoa kum 1979-a din a ni nghe nghe a ni.

May 13, 2026 khan Mizorama Science NGO upa ber Mizoram Science Society (MSS) chuan Aizawl Hospital-ah, Mizorama a hmasa ber atan Mizoram Science Award chu Dr. L.N. Tluanga hnenah hian an hlan a ni.

Mizoram Science Award hi Nizote zinga science leh a kaihhnawih lama khawtlang leh ram tana hnuhma nei tha te, scientific research lama mi hming tha leh thawhhlawk te hnena hlan thin tura Mizoram Science Society-in a duan niin a dawng hmasa ber tur atan Dr. LN Tluanga hi an thlang. He award hian tangkafai Rs 50,000 a keng tel.