Dr Mathlana’n dan bawhchiatna a nei lo

ZPM chuan thuchhuah siamin, MNF Party-te vawiin khan Vanapa Hall kawtah an pungkhawm a, dik lo takin Minister Dr. Vanlalthlana an puh tih tarlangin, “Hei hi a pawi kan ti hle. Dan bawhchhiatna pakhatmah nei lo minister heti taka party pakhat meuhin an bei duh hi thil an hriatchian loh vang nge, an hriatchian duh loh vang zawk tih kan zawt a ni,” an ti.

ZPM tarlan danin, thudik loa MNF Party-ten Dr. Vanlalthlana an puhna; PM-USHA tender chungchang hi T. Lalhlimpuia, MLA, Chairman, Committee on Petitions 2025 chuan January 13, 2026 khan a lo sawifiah daih tawh a, “Committee on Petitions chuan sum kal fel lo a chhui lo. Tin, PM-USHA chungchang chhui turin committee hran a din lo a, special report a thehlut lo bawk. Tendering process chungchang a ni a, sum chungchang a ni lo. Tender process chungchanga hrilhfiah dan (interpretation) inan loh avangin, tender nawn (re-tender) turin recommendation a siam mai a ni. Tin, tuna PM-USHA chungchang bakah hian thu (issue) dang pahnih bawhzui lai a nei mek bawk a ni,” tiin Committee on Petitions Chairman chuan a sawifiah tawh a ni.

Hei bakah hian Mizoram Legislative Assembly danah Committee on Petitions hian a zirchianna hi Speaker hnenah report/recommendation a pek bak press mite hnenah a puanzar phal a ni lo, tih a ni. Hemi baka thiltih a awm a nih chuan “Rules of Procedure and Conduct of Business in Mizoram Legislative Assembly” dan kalh a ni ang, tiin Chairman hian fiah takin a tarlang bawk.

Higher & Technical Education Department chuan PM-USHA hnuaia hna thawh tur dan angin Open Tender a chhuah a, a chhanna enfiah a nih laiin Tender chhangtu Contractor te atangin ‘complaint’ a awm. ‘Complaint’ chu Committee on Petitions -ah thehluh niin anni hian an chhuichiang ta a, Assembly dan angin Speaker hnenah rawtna an thlen thei a ni. PM USHA tender pawh hi chutianga dan ang taka kalpui a ni.

Dr. Vanlalthlana hi dawta puha tihhniam tumin MNF Party hian hma an la nasa hle a ni. A Department chan ṭhenkhat Minister dang hnena pek chungchang pawh hi amahin chak leh ṭha zawka department a enkawl theih nan ama ngen anga lak ṭhensak zawk a ni a, Chief Minister pawhin budget session kal mekah hian fiah takin a lo sawi vek tawh zawk a ni.

Zirna Sikul kal hunbi sawn chungchang pawh hi Mizoram Education Reforms Commission (MERC) te rawtna zulzui zela enho a ni. Tuna hunbi thlak chungchang pawh hi zirna lama thawktu pawl hrang hrang te, tlawmngai pawlte leh mipui nawlpui huapzo thei ang berin sawihona leh rawtna hun vawi eng emaw zah hawn a nih hnuah kan ram leh hnamin a thatpui ber tur thlir chungin tihpuitlin tum a ni ta chauh a ni.

Thudik awm renga a dik lo zawk mipuite hnena puanzar a, Mminister hnathawk ṭha tak beih hi MNF Party hian sim tawh se a duhawm thu tarlangin ZPM chuan, “Hetiang ram hlui zia ‘politics’ hi Independence puan kum 60-na lawm pha tawh party hian sim tawh rawh se,” an ti.