Dr. Thangtea leh Kolasib MNF hruaitute an inkawm

Nizan (14.5.2026) khan MNF Senior Vice President Dr. R. Lalthangliana, MLA chu Kolasib MNF Block hruaitute nen Circuit House, Kolasibah an inkawm.

Dr. R. Lalthangliana, Chairman Programme and Policy, MNF chuan sn party-in policy and programme an duan chu mi thiam ruallte nen vawi tam tak uluk takin an ngaihtuah hoa, an thutkhawm tawh thu a sawi a, “Fimkhur taka kan kalpui avangin kan la tlangzarh rih lo. Hun remchang hmasaah kan tlangzarh ang. Pathian leh mipui zarah MNF sorkar leh hunah kan hmachhawp leh tih turte chu uluk takin a tlangpui kan duang fel tawh,” a ti.

MNF a sorkar chuan tun anga sorkarin sum tam taka khawhralna eng emaw zat, mimal leh party mi leh sate venthawn leh induhsakna avanga consultant ruat vak vak ang chi leh political appointment inpek teuh teuh angte tihbo a nih tur thu sawiin MNF Sr. Vice President chuan, “Adviser to CM heti zat kan neih mekte hi thil tul lo, sorkar sum tam tak sen ralna a ni. MNF sorkar a pian hunah kan tih ve chiam chiam dawn lo,” tiin MNF sorkar liam taah khan CM Adviser pahnih chauh an neih thu a sawi.

MNF Programme and Policy Chairman Dr R.Lalthangliana chuan, “Inthlan campaign laia tih tur intiam vak vak a, thlan tlin hnuah tih leh si loh ang chite chu MNF chuan kan ti ve dawn lo. Keini chuan a tak taka kan tih tur, kan ramin a mamawh bik chauh, a mi nawlpuiin kan tangkaipui tur chauh kan pholang mek a ni, ” a ti.