Duhoma’n a ram chungchang a sawifiah

Chief Minister Lalduhoma chuan vawiin (23.3.2026) a ZPM-in AMC inthlan lo awm tur atana candidate puan inkhawm Vanapa Hall-a an buatsaihah MPYCC-in a bial chhunga ram a neih an sawi chungchang a sawifiah.

Lalduhoma chuan MLA ni tawhte chuan an bial chhunga harsatna tawkte, mamawh leh duh reng vang ni loa ram an leisak thin chu an hriatthiam a rin thu sawiin, “Helai bialah hian vawi thum thlan tlin ka nive tawh. Mi harsaten ka huan min chan sak hram rawh tih avangin mamawh vang pawh ni loin ram lei ka nei. Mi harsate puihna atan. Inthlan hmaa ka lei a ni,” a ti.

MPYCC-ten Pu Duhoma an tih sirah a hmaa bialtu MLA-in ram zau deuh, dilte pawh awm a neih thu sawiin Lalduhoma chuan, “Sawisel turah pawh kan ngai lo, mi harsate pawh a pui ve a ni ang,” tiin Pathianin ‘phuba reng reng la suh u, keima lak tur a ni’ tia a sawi chu a innghahna a nih thu a sawi.

Lalduhoma chuan eng ang pawhin miin sawi chhe mah se, Lalpan a chawimawi chuan tawk a tih thu sawiin, “Kan sorkar hi Pathianin a chawimawi a, kan tih theih loh tura ngaihte kan ti thei. Kan party kan sorkar hi party dang aiin kan tha zawk tur a ni,” a ti.