News

Vawiin (23.4.2026) hian Education Minister Dr Vanlalthlana chuan a office chamber-ah thuchah sawiin, Mizoram Board of School Education (MBSE) buatsaih, HSLC Examination 2026 result ruahman lawk anga tihchhuah a ni ta chu lawmawm a tih thu a sawi a, “Zirlai exam hmachhawn mi 18,257 aṭanga 80.31% laiin hlawhtlinna an chang thei leh nikum aia pass percentage a sang thei hi a lawmawm hle,” a ti.

Education Minister chuan kumin HSLC result chhuakah hmasawnna lawmawm tak sorkar sikulah a lang tih sawiin, “Nikumah sorkar sikulah 68.01% in pass a, kumin hian khumin 72.07% in an pass, Candidate zawng zawng an fail vekna school-ah RMSA School la nei nual mah ila, sorkar sikul tih hmingpu an lang tawh lo leh zaa za an pass vekna sikulah kum dang aia sorkar an lang tam a, sorkar sikul 21 zet an lang hi a lawmawm hle. Kan result hian zirlaite tan sorkar sikul a belhtlak tih a rawn tarlang a ni,” a ti.

Kumina result tihchhuah dan chu a lo puanzar tawh angin kum dang aia a danglam thu leh top ten leh division-te an lan tak loh thu te, MBSE website-ah erawhchuan zirlaiten an mark leh percentage an en zung zung theih thu leh hei hi board dang pawhin an kalpui dan a nih thu sawiin Dr. Vanlalthlana chuan, “Hei hian a tha zawnga nghawng a neih chhoh zel,” a ti a, zirlai hlawhtlinna chang thar zawng zawngte thinlung taka a lawmpui thu leh an hma lam hunah hlawhtlinna an chan zel theih nan duhsakna sang ber a hlan.

Education Minister chuan hlawhtlinna chang zo ta lote pawh beidawng mai loa, nasa zawka ṭan la sauh sauh tur leh result lawmawm nei thei ngei turin a chah a ni.