Feb 17, 2026
Tuesday
Vawiin (17.2.2026) khan Power & Electricity Secretary K Lalrinzuali hoin a office-ah smart metre hmanga automatic billing kalpui tan mek avanga electric bill tam anga sawi awm chungchang sawiho a ni.
Meeting-ah hian hian electric hman man tihpun a nih loh thu tarlan niin, a hmaa metre reader-te hmanga manual reading lak thin atanga smart reading hmanga bill siam tan a nih taka vanga mipuia hriatthiam loh awmte mipuite hrilhfiah nise, tiin an rel.
Meeting-a tarlan a nih danin, electric meter reading hi mihring (meter reader) hmanga reading lak a nih hian reader-te’n consumer inah va kalin reading an va la thin a, an reading lak chu office-ah an theh lut leh a ni.
Office-ah bill siam hna thawh niin, bill siam fel hun chhung hi thla khat vel a ni thin. Office-ah bill siamfel a nih hnuah consumer hnena bill va sem chhuah leh a nih meuh chuan thla khat a lo liam tawh thin avangin consumer-in thla khat hnuah bill a hmu chauh thin tihna a ni.
Smart meter (smart billing system) ah chuan remote (GPRS Communication) hmanga reading lak theih a nih tawh avangin reading lak rualin office-ah bill siam nghal theih a ni tawh. Up-to-date bill consumer-in a dawng thei tawh thung a ni.
Hun rei tak mihring (meter reader) hmanga bill siam thin a nih avangin thla khat liamta bill hlir consumer-in kan dawng thin. Mah se, smart billing system hmanga bill siam tharte chu up-to-date bill pek a lo tul tak avangin thla 1 kar awl hnawhkhah a lo ngai ta a, thla 2 bill kha tum khatah siam a lo ngaih tak avangin billing period a lo rei a, electric bill a lo tam ta thin a ni.
He bill sang bik hi smart billing system a bill siam rem thla (vawi 1) chiah a ni dawn thung a, a hnu zelah chuan a pangaiin a kal tawh dawn a ni. Billing period rei vanga vawi khata bill pek harsate tan bill counter-ah kalin installment a pek theih.
Smart metre la hmang ve lo te pawhin an hman hunah thla khat bill ni loin smart metre a bill update nen khan an chawi ve a ngai dawn. Smart metre hman tan thlaah lo chuan bill hi a pangaiin a kal char char tawh dawn a ni. Smart metre hman vek hunah chuan bill tihsual a awm thei tawh dawn lo.
