FCAA thlawp hi a pawi &#8211; Lal Thanzara

MPCC chuan vawiin (24.10.2025) hian an office-ah political session an hmang a, thusawitu MPCC President Lal Thanzara chuan ZPM Sawrkarin Forest Conservation Amendment Act (FCAA), 2023 an thlawp chu pawi a tih thu a sawi rualin, MNF chu FCAA an duh lo tak tak a nih chuan NDA chhuahsan turin a phut.

Lal Thanzara chuan, ‘FCAA hi MNF-te hian an duh lo tak tak a nih chuan he dan siamtu BJP leh a thawhpuite pawl NDA hi chhuahsan rawh se. MNF te hian FCAA dodalin total bandh an buatsaih dawn. An duh loh thu an tlangau nasa a, he dantu BJP lamṭang NDA a vawiin thlenga tel an ni.’ a ti.

Lal Thanzara chuan opposition MLA a nihlaia nasa taka FCAA dotu vawiin a kan CM hian tunah a lo thlawp ta mai tih sawiin, ‘A pawi takzet a ni. Hmanni lawkah Delhi ah AICC hotute kan bia a, kan ram map te kan entir a, international boundary aṭanga kms. 100 huam chhung, Burma leh Bangladesh inkar zimzia kan entir. Central-ah chuan Congress in FCAA hi kan do sa a ni an lo,’ tiin thuneihna an chan leh hunah FCAA chungchang hi an ngaihtuah nawn leh dawn thu an hrilh tih a sawi.