FCRA Bill a ngai ngaiin kan duh lo

Kohhran pakaw telna Council of Churches in Mizoram (CCM) chuan August 11, 2026 khian Foreign Contribution (Regulation) Amendment (FCRA) Bill, 2026 duh lohna lantirna atan Aizawlah kawng an zawh dawn.

CCM hruaitute chuan vawiin (30.7.2026) hian Aizawl Press Club-ah press conference an koa, FCRA Bill, 2026 chu a vai chuan an duh lo hulhual loh thu sawiin, “A tha tam tak karah hmansual theih a awm dawn. A nih ang ang chuan pawm chi loah kan ngai a ni,” an ti.

FCRA Bill-ah hian building leh assets dangte chhuhsak theihna a awm thu sawiin CCA hruaitute chuan, “Sum kan hmang dik lo nia an hriat chuan kan building leh assets dang min chhuhsak thei dawn. Tin, FCRA kan cancel emaw renew duh tawh lo a nih pawhin chhuhsak theihna hi a huam tho. Chik zawka han zira India rama hnam hnufual (minority) te chunga thil thleng tawh leh thlen mekte nena en chuan a hmangtu tana hmansual theih a awm ngei dawn niin a lang,” tiin chhuanlam eng emaw hmanga building leh assets inchuhsak theihna hmanruaah an ngaihthu an sawi.

CCM hruaitute chuan FCRA Bill-ah ram dang atanga FCRA hmanga lo dawnte sakhaw danga inlehtir nana hman phal a nih loh thu sawiin, “He dan kengkawhtuin hetiang hi an man emaw, an hmu emaw a nih chuan FCRA cancel sak a, an bungrua leh thil neih cancel sak vek theih an ni. Sakhaw danga inlehtir chhuanlam hmangin India ram hmun hrang hrangah Kristiante tihduhdah leh man an tawk tawh. He dan hian license tih tawpsak a, an thil neih chhuhsak awlsamna a thlen dawn ngeiin a hriat,” an ti.

CCA-in ruahmanna an siam dan chuan FCRA Bill, 2026 duh lohna kawng zawh August 11 buatsaih an tumah hian Zarkawt leh Sikulpuikawn atanga zawh tanin, Vanapa Hall kawtah a kharna hun an hmang ang. Phalna an la lak loh vangin sawmna an la siam loa, phalna an hmuh chuan CCM a tel kher lo pawh FCRA Bill in a nghawng kohhran dang leh NGO-te pawh tel turin an sawm dawn.