News

MNF chuan vawiin (27.7.2026) hian an office-ah politicial session an hmang a, MNF Vice President Lalchhandama Ralte, Leader of Opposition chuan Foreign Contribution (Regulation) Amendment (FCRA) Bill, 2026 chungchang sawifiahin, Mizoram MP pahnihte chu FCRA Bill-ah abstain lo tura an phut thu a sawi.

MNF Vice President chuan FCRA chu kohhran, NGO, society etc-ten foreign atanga tanpuina an dawn enkawlna dan a nih thu sawiin, “FCRA dashboard-a a lan danin Mizoramah associations registered 78 awmin, heng zinga 34 chu license thi leh license cancel 35 an awm, active chu 19 an awm a ni,” a ti.

FCRA Amendment 2026 ah hian foreign contribution dawng thei tho si, tih hleih theih lohin siam an tum tih sawiin Lalchhandama Ralte chuan, “Mizorama sikul, fahrah enkawlna leh thil dangten an tuar dawn,” a ti a, FCRA chu Kristiante’n kan dodal nasat thu a sawi.

MNF Vice President sawi danin, he danah hian an hmunhma (assets) laksakna dan te, SBI Main Branch-ah chauh tanpuina sum a luh theihnate a awm. Central Sorkar chuan engkim an centralized dawn. FCRA hi MNF chuan do ngei ngei a duh a ni. FCRA an duh lo thu vantlang hriatah kan puang chhuak tawh.

MNF President Delhi-a cham mek pawhin hotu liante hnenah an duh lohna hi a thlen dawn. FCRA hi Lok Sabha leh Rajya Sabha-a kan MP-ten nasa taka an dodal an beisei,. Mizoram MP pahnihte chu abstain mai mai lo turin an phut. Nagaland leh Meghalaya-ah chuan an CM-ten kohhran hruaitute nen Delhi-ah hotu liante an sawipui tawh. Mizoram pawhin hetiang tur hian an phut bawk a ni.