Fimkhur turin Mizote chah

Chennai Mizo Welfare Association (CMWA) chuan thuchhuan siamin, Chennai khawpuiah hun rei tawh tak ațang khan zirna leh hna avangin Mizote kan lo awm ve țan tih tarlangin, “Chennai-a Mizo awmte buaina, harsatna leh thlavang hauh ngaihna hrang hrangah phak ang tawkin hma a la thin a ni,” an ti.

Tun hnaiah Mizoram leh India ram state dang ațanga Mizo awmte Chennai khawpui leh a chhehvel a hnathawk tura chah a, ngaihtuah zui tha leh lo an awm leh ta nual tih tarlangin CMWA chuan, “Hemi kawngah hian Mizoram leh India ram state danga Mizo awmte fimkhur turin kan inchah nawn mawlh mawlh a ni,” tiin harsatna tam tak kan tawh thinte sutkian nan Mizo awm mekte leh rawn awm thar turten an thuchhuah hi ngaipawimawh a, zawm turin an ngen.

Zawm tura an ngente :

1.Chennai-a Mizo awm zawng zawngte CMWA membership registration ti vek turin kan inhriattir a, state dang leh Mizoram atang a Chennai-a lo awm turte pawh CMWA membership registration hi rawn ti hmasa zel turin kan inngen nghal bawk a ni. CMWA membership registration ngaipawimawh lo, harsatna leh buaina tawh chiah a CMWA be pawp a, sawisel chhunzawm ching kan awm thin. CMWA membership registration ti lote chungah harsatna a thlenin CMWA chuan mawh a phur lo ang.

2.Agency kaltlang a hnathawk tura kan thalaite lo thawn thin ten kan naute an hnathawhna hmunah thla thum hlawh an lak thleng tal buaipui zui turin kan inngen a, nu leh paten kan naute an hnathawhna tur rintlak ani em tih fiah hmasa phawt tur leh damdawi ruih/tih ching chu rawn thawn lo turin kan inngen bawk a ni.

3.Hnathawk tura rawn kal turten, kan hnathawhna turte nen agreement(ziak ngei a dah) siam ngei tur leh, chu agreement chu zir chianga zawm turin kan inngen a, hei hian hlawh lak theih loh leh dan lo ang a hna atang a ban kawngah nasa takin a pui thei ang.

4.Zirna avanga rawn awm turten zawhfiah duh kan neih chuan CMWA hruaitute a zawhfiah theihreng bawk a ni.

5.Aadhar card phone nen a link a, soft copy (email emaw pendrive-ah) print out mai theih a dah tur leh ID card dang leh Documents mumal tak nei tura hriattir kan ni.

6.Bank account leh ATM card nei ngei tur leh a theih chuan internet banking ti ngei turin kan inngen. Hei hian hnathawka awm tan hlawh lak kawngah nasa takin a pui theia, damlohna leh thihna hial thleng thutah pawh chhungte nena pawisa inthawn kawngah nasa takin a pui thei a ni.

7.Chennai a Mizo awmte, kan hun neih dan a zirin CMWA inkhawm leh thiltih pawimawhah a tam thei ang ber tel turin kan insawmin kan inngen bawk a ni.