FIR leh criminal complaint thehlut

MNYF President Gogo Lalremtluanga s/o J. Thanghuama (L), R/o New Street, Mission Veng, Aizawl chuan, vawiin (24.07.2026) hian Aizawl Cyber Police Station-ah FIR a thehluh bakah Chief Judicial Magistrate Court, Aizawlah Criminal Complaint BNS, 2023 leh IT Act, 2000 hnuaiah a thehlut a ni. Civil Complaint hi Chief Judicial Magistrate Court, Aizawlah remchang hmasa a la thehluh tur a ni.

Gogo Lalremtluanga tarlan danin, heng FIR leh criminal complaint hi kum 2016 a dik lo taka inpuhna avanga case lo awm tawh social media-a post a awm nawn leh vang a ni. Kum 10 dawn kal ta a case awmah khan ni 16.10.2020 ah court zahawm tak chuan amah hi thiam a chantir tawh a, “prosecution failed to prove the allegations”, tiin thutlukna a lo siam tawh a ni.

Mah se, thiam a chan tawh hnu hian mi thenkhat ten 2026 ah social media / digital platform-ah hemi thudik lo hi an rawn re-post leh. Chuvangin, heng dan palzutnate hi ngaih zam theih a ni ta lo a, dan ang taka hma lak a lo tul ta a ni.

Gogo Lalremtluanga chuan thudik lo darh avanga, a zahawmna tih chhiat a nih avangin court atanga rorelna dik – justice a dil tih a sawi a, “He thil thleng hi midangte tan pawh a zirlai tha tak a nih a, court-in thiam a chantir tawh hnua, midang sawichhiat / puhchhiat leh hi danin a phal lo tih mipuite hriat ka duh,” a ti.