Firm/mimal 11 pawm an ni

Vawiin (19.8.2026) hian Chief Minister Lalduhoma hoin a pisaah Mizoram Liquor (Prohibition) Amendment Act, 2025 hnuaia Local Fruit Beer manufacturer leh Winery licence pekchhuah tur thlangtu tura din Selection Committee-te an thukhawm a, dilna 99 lut zingah Selection Committee-in a endik tawh mimal/firm 11 pawm an ni. Meeting hi Excise & Narcotics Minister Lalnghinglova Hmar chuan a telpui.

Chief Minister chuan, “Kan ngaih pawimawh hmasak ber chu kut hnathawktute an ni a, an thei leh thlai thar man man zawka an hralh theihna tur remchang kan siamsak dawn a, a lawmawm hle. Tunlai thiamna hmanga sawngbawl a, mihring hriselna ngai pawimawh chunga food safety standard ang taka kalpui hi kan tihmakmawh a ni,” a ti.

Selection Committee chuan powerpoint presentation hmangin local fruit beer leh wine siam thei tur an endik dan leh tehfung hrang hrang an hmante an sawifiah. Tehfung zingah food safety guidelines an zawm thei em, a siamna hmanrua puitling an nei em, chung hmanruate tha taka hmang a enkawl thei turin mihring leh sum an nei em, Mizorama thei leh thlai tharchhuah ngei hmang dawn se an tlin ang em tih te a tel.

Local fruit beer siam dil hi mi 96 leh winery din dil mi pathum an awm. Selection Committee chuan diltute tan interview a buatsaih bakah a a theih ang angin a hmunhma an endik a ni. Endikna behchhana Selection Committee in rawtna a siam atangin vawiina meeting chuan local fruit beer siam dilna 11 a pawm a, dilna dang 13 te chu hun pek belh a, endik leh phawt nise, an ti.

Selection Committee-ah hian Commerce & Industries, Excise and Narcotics Department, Horticulture Department, Food & Drugs Administration aiawhte, Handholding CEO bakah Mizoram University leh mimal he mi kawnga thiamna bîk neite an tel.