Free UPSC Coaching Programme

Vawiin (24.6.2026) chhun khan Mizoram Youth Commission (MYC)-in Drishti IAS coaching institute nena tangkawpa an buatsaih ‘Free UPSC Coaching Programme’ chu MYC Auditorium-ah Chief Secretary Khilli Ram Meena chuan a hawng.

Chief Secretary chuan March 2025-a Union Home Minister Amit Shah-in Mizoram a rawn tlawh khan, Mizoramin harsatna hrang hrang a tawh mekte chu sawiho turin Mizorama Civil Society Organisation-te nen an inkawm tih sawiin, “Chumi inkawmhona atang chuan Mizoram atanga IAS tling hnuhnung ber pawh kum 2014-a tling niin, Mizoram atanga All India leh Central Civil Services-a inziak tling an tlem hle tih a lang chhuak. He thu hi ngai pawimawhin State official-te chuan ngaihtuahna leh sawihona an neih hnuah tuna Free UPSC Coaching Programme hi an duang chhuak a, India rama coaching institute hlun leh changtlung berte zinga mi Drishti IAS, New Delhi chu thlan a ni,” a ti.

MYC Chairman Malsawmzuala Ralte pawhin thu sawiin, “Mizoramah hian Central Civil Services exam-a hlawhtlinna thlen tumin kohhran, sawrkar leh khawtlang mite chuan an theih ang angin an thawk a, mahse hlawhtlinna chu mimal tumna leh thawh rimna hmang chauhin a thleng thei,” tiin zirlaite chu an vanneihzia hrilhin he coaching programme hi hmang tangkai a, an theihtawp chhuah turin a fuih.

FREE UPSC COACHING CHANCHIN TLANGPUI:

*UPSC hnuaia Civil Services Examination-ah Mizo thalaite an luh hnem lehzual theihna turin, Mizoram Sawrkar chuan Mizoram Youth Commission kaltlangin thla 12 chhung a thlawna UPSC Coaching kalpui tura ruahmanna thar a siam.

*Hemi atan hian India rama Coaching Institute hlun leh changtlung berte zinga mi Drishti IAS, New Delhi nen thawhdunna thuthlung an ziak a ni. Uluk taka screening process neih a nih hnuah UPSC aspirant 100 thlan chhuah an ni a, he coaching program hnuaia class-te hi March 24, 2026, atang khan kal tan a ni.

*He programme hnuaiah hian general studies class chu offline-in neih a ni a, optional subject paruk -Political Science & International Relations, Geography, Sociology, Anthropology, History leh Public Administration chu online-in zirtir a ni bawk. Hemi bakah hian, Aizawl pawna mi zirlaite tan hostel facility pawh siam a ni.