News

Indian Oil Corporation Limited (IOCL) chuan gas man a tisang a; India ram pumah nimin (7.3.2206) khan hman tan nghal a ni. IOCL-in gas man a tihsan avang hian Food, Civil Supplies & Consumer Affairs (FCS&CA) Department pawhin gas man tihsanna a chhuah ve nghal.

FCS&CA Secretary chuan, IOC, Silchar Indane Divisional Office hnuaia Divisional LPG Sales Head atangin Mizoram sorkarin lehkha a dawn thu a tarlang a, “Tunlai khawvel hmun hrang hranga geo-politics boruak avanga India ram chhunga LPG lak luh man a to chhoh thu leh IOC-in LPG rate a ennawn thu kan dawng a, March 7, 2026 atangin domestic LPG cylinder (14.2 kg) man chu India ram hmun dang angin Mizoramah pawh bûr khatah Rs. 60-in tihsan a ni,” a ti.

Eirawngbawlna gas (domestic kg 14.2) chu bûr khatah Rs 60-in a pung a; Vairengteah Rs. 1,056 a ni tawh a, Vairengte tih loh Mizoram hmun dang zawngah Rs. 1,065 a ni. Gas man tarlan atang hian gas lakna hmun (home delivery, point delivery, etc) azirin pawisa chawi belh ngai a la awm.

Commercial cylinder (kg 19) chu Rs. 115-in a pung a, Vairengteah Rs. 2,318.50 leh hmun dang zawngah Rs. 2,333.50 a ni tawh. Heng bakah hian, gas bur dang mante India ram pumah tihpun a ni.

Hetih lai hian, Aizawla gas distributor/agency thenkhat chuan India-in gas a lak luhnaah harsatna a tawh avang hian eirawngbawlna gas home delivery tura book theih hun tihdanglam a niih thu an tarlang. Gas lak hnuhnun ber atanga ni 21 a ral hma chuan gas a book theih tawh rih loh nia thu dawn a ni.