News

GIG Motors chuan sawm bik hmaah ningani zan khan Thara Resort, Falkland-ah Mizorama hralh chhuah theih turin Maruti Suzuki electric car thar eVitara an tlangzarh a, 2026 Indian Car of the Year Vitoris an pho chhuak tel bawk.

eVitara hi Maruti Suzuki-in India rama electric car a siam chhuah hmasak ber a ni a, December 2, 2025 khan tlangzarh a ni tawh. Thla hnih leh ni 24 hnuah a behbawm tel lovin Mizoramah pho chhuah ve leh a ni a, February 9-a result tihchhuah Mizoram Police Service-a tling zinga titha ber K Lallungmuana’n a khung hawng.

GIG Motors chuan pakhat an hralh chhuak nghal a, Mizoramah a man tlawm ber Rs 18,62,763 a nih lain Rs 21,08,263 leh Rs 21,32,913 man a awm bawk. Him tha tak turin aig bag pasarih a pai a, a khalhtu tan nuam leh awlsam turin ADAS level 2 a nih bakah changkang taka thuam a ni bawk.

eVitara hi 49 kWh battery leh 61 kWh battery hmang a awm a, charge full-in 49 kWh-in km 440 leh battery lian zawk 61 kWh-in kg 543 a tlan thei a, Mizoram kawng chhuk chhovah erawh danglam thei tura ngaih a ni.

Maruti Suzuki chuan an electric car leitute awlsam nan battery charge-na tur a tam thei ang ber bun tumin hma a la tel nghal. Mizoramah GIG Motors Showroom pahnih Edenthar leh Thuampui bakah Service Centre, ITI Vengah charging station bun fel a ni tawh a, heng bakah hian Aizawl chhung leh pawn oil filling station hrang hrangah dah a ni ang.

India rama car hralh hnem ber Maruti Suzuki hian September 3, 2025 khan Victoris a tlangzarh bawk a, thla khat hnu October 8-ah GIG Motors-in Mizoramah an khuh hawng ve leh. SUV laihawl huanga mi Victoris hi 2026 Indian car of the year-a thlan a ni a, zawrh chhuah a nih atanga thla li chhungin 50,000 an hralh chhuak.

Mizorama Maruti Suzuki dealer GIG Motors chuan eVitara an tlangzarh rualin an pho chhuak thar leh a, Mizoram Information Service result chhuak hnuhnung bera titha ber John Hualhmingthanga’n khuh hawngin, lirthei ngaihventuten an belchiang zui nghal a ni.