Governor-ah kan thlen dawn &#8211; T Zakunga

LADC-a MNF Legislature Party leh ZPM Legislature Party thawh dunna Lairam Legislature Party (LLP) Leader T Zakunga chuan vawiin (15.12.2025) tlaiah Governor hnenah sorkarna an siam theih thu an thlen dawn thu a sawi.

ZPM Legislature Party Leader ni bawk T Zakunga hian vawiin chhun khan ZPM Office-ah thu sawiin, “Mizoram kaihruai turin ZPM Sorkar chak tak Pathianin min pe a, chutih laiin LADC-ah ZPM-in MDC member 6 chauh kan nei hi keini pawhin tlem kan tih rualin; Pathian remruatah kan ngai a ni. Inthlan zawhah sorkar din tumin Congress party nen ZPM PAC hmalaknain kan inbe zui,” a ti.

Uluk taka an hotuten an ngaihtuah hnuah MNF Legislature Party nen sorkar ngelnghet zawk din theih a nih beiseiin inremna an siam tak thu sawiin T Zakunga chuan, “LADC-ah sorkar ngelnghet a awm theih loh avangin hmasawnna kawngah pawh kan thuanawp phah hle niin kan hria. Chuvangin, lungrual takin kan hotute kaihhruaina hnuaiah sorkar thar din turin Governor hnenah vawiin tlai hian sorkarna kan siam theih thu kan thlen nghal dawn a ni,” tiin MNF an thawhpui chhan a sawi.