Governor lakah CYLA an lawm lo?

Central Young Lai Association (CYLA) chuan Lai Autonomous District Council (LADC) ah a nihdan tur anga sorkar a pian thuai an phut thu ziakin Governor hnenah vawiin (23.1.2026) khan an thlen a, January 24, 2026 tlai dar 4 thleng an ngaihchan tur thu an hrilh.

Thulakna The Lawngtlai Post tarlan danin, nimin khan Central YLA Executive Committee chu President F.Lalrothanga kaihhruaiin an thukhawm a, LADC-ah sorkarna a pian mai loh chungchang an ngaihtuah.

Central YLA thuneitu sang thukhawm chuan December 9, 2025 a LADC Inthlanpui result hriat a nih hnuah, party mala sorkarna siamthei awm lo mah se, sorkarna siamthei tura thawhdunna neite pawh sorkarna siamtir an ni lo chu hriatthiam har an tih thu an sawi.

CYLA chuan Governor hnenah, LADC awmdan chu democracy hlutna tihniamtu ni a an ngaihthu te, hmasawnna a kaltheih loh thu te, mipui mimirin democracy ropuina an hmuhdan a hniam phah mek thute leh rinna an nghah ngamloh phah a hlauhthawnawm thute thlenin, LADC ah sorkarna mumaltak din a nihtheih nan hmala turin Governor chu an ngen.

An ngenna chu January 24, 2026 tlai dar 4 thleng an ngaihchan tur thu leh, an beisei anga hmalakna a awmloh chuan Republic Day boycott hial pawh a tul mai theih thu Governor hi an hriattir.