Govt. Aizawl College building sawiho

Nimin khan Higher & Technical Education Minister Dr. Vanlalthlana chu a pisa-ah Mizoram Presbyterian Kohhran hruaitute nen an inkawm a, Sikulpuikawna Govt. Aizawl College building inhlan chungchang an sawiho.

Meeting-ah hian building inhlan fel dan tur chungchanga hma lo la tur leh agreement duangtu tur Drafting Committee an din. Higher & Technical Education Director chu convenor atana ruat niin, department aṭang hian committee member atan Under Secretary leh Govt. Aizawl College Principal ruat an ni. Mizoram Presbyterian Kohhran aṭangin Rev. Dr Rosiamliana Tochhawng, Executive Secretary (i/c Education) leh Synod Secretary (Jr) Upa C. Lalduhawmate chu ruat an ni.

Mizoram Sawrkar leh Mizoram Presbyterian Kohhran inremna angin kum 2019 khan Sikulpuikawna Govt. Aizawl College dinna ram hi Mizoram Presbyterian Kohhran kutah hlan a lo a ni tawh a ni. Govt. Boys Primary School leh Govt. Boys Middle School, Sikulpuikawn chu school building leh a ram nen Mizoram Presbyterian Kohhran kuta hlan niin Govt. Aizawl College building chu hemi ram hian a huam tel.

Govt. Aizawl College building Mizoram Presbyterian Kohhran hnena hlan fel vat a nih theih nan hian hun tiam siam niin a hma thei ang bera sawiho leh a, sawrkar leh kohhrana thuneitu sang zawk hnena thlen vat ni se tih a ni.