News

Vawiin (21.1.2026) chawhnu khan Tourism Minister Lalnghinglova Hmar chuan Guwahati Mizoram House-ah press conference koin, “Kum 2025-ah 96%-in khualzin an pung; Aizawl hi India rama Krismas khawpuia siam kan tum,” a ti.

Lalnghinglova Hmar chuan Aizawl chu India ram Krismas khawpui, ‘Christmas capital of India’ ah chantir an duh thu a sawi a, “Thlasik boruak nawm lai takin Lammualah ‘Winter Festival’ buatsaih a ni a, mipuiin an hlut hle. December 23 & 24 ah Aizawl khawpuia kawng lun lai ber chu ‘No vehicle zone’ niin mihring tan hawn a ni a, intihhlimna hrang hrang buatsaih a ni thin. December 23 ah ‘Christmas Parade’ hlimawm tak neih thin a ni bawk.” a ti a, December 26-a ‘Krismas Ruaitheh’ chu India ram hmun danga awm ve lo, Aizawl leh Mizoram krismas lawm dan tihlutu leh chhim tichakawmtu a ni, a ti. December 31-ah Sakawrhmuituai tlang mawi tak atangin music nen a huhova kumhlui thlahho thin a nih thu a tarlang bawk.

Tourism Minister chuan Aizawl chu traffic dan zawmthatna leh bengchhen lohna, ‘Silent City’ a nih thu pawh tarlangin, “Hei hian khawpui nun a tihahdam a, Ministry of Housing & Urban Affairs pawhin Mizoram Sawrkar hnenah ‘Special Award’ a hlan. He award hian Mizo mipuite chu tlawmngaih tak leh midang ngaichang thiam an nih a lantir.” a ti. Mizoram tlawhtute’n tih tur leh tlawh tur an hriat a, hun nuam leh hlimawm tak an hman theihna’n ‘Tourism Event Calender 2026’ buatsaih a nih thu pawh a sawi.

Tetea Hmar chuan Covid-19 boruak reh hnuah a kum telin Mizoram tlawhtu an pung tih sawiin, “State lian zawkte nen khualzin zat ngau ngau khaikhin chi ni lo mah se, kum 2023 atanga 2024 ah 130% chuangin Mizoram tlawhtu an pung a, kum 2025 ah pawh a let deuhthaw, 96.9% in an la pung. Hei hian Mizoram chu tourist te tlawh chak ber zinga mi a ni zel tih a lantir a, kum 2026 ah pawh India rama tourist destination thlanawm ber zingah kan tel ka ring tlat a ni.” a ti.

Minister hi Tourism Director R. Lalrodingi leh official dangten an tawiawm.