News

Mizoram Police chuan thuchhuah siamin, H. Lalramdinpuii (15), Mualthuam North thah a nih chungchanga Lunglei Police Station Case No. 84/2026, u/s 103(1)/140(1) BNS hnuaia thubuai chu Lunglei Police Special Investigation Team (SIT) ten a tir aṭangin uluk takin hma an lain an chhui zui zel tih an tarlang.

Mizoram Police tarlan danin, rinhlelh kai thei tur thil awmte chhui chian nan mi hrang hrangte koh an ni tawhin, mi pahnih, Denghmingthanga (20) leh Lalneihkima (34), Mualthuam North ve ve te chu vawi tam tak thu zawh fiah turin koh an ni tawh a ni. Police-te chuan an phone hman dan (digital evidence) leh forensic evidence an kalpui atanga rinhlelhna awmte chu an chik chho zel a, chung finfiahna te leh zawhna chi hrang hrang an hmachhawn hnuah, vawiin ni 20.08.2026 hian hemi te pahnih hi Lunglei Police SIT te hmaah an inpuang ta a ni.

Inpuanna an neih hnu hian dan ang takin vawiin chawhnu dar 1:00 khan man nghal an ni a, danin a phut angin vawiin chawhnu vek khan Judicial Custody-ah dah nghal an ni . H. Lalramdinpuii thah a nih chungchanga thil thlen dan kimchang leh finfiahna (evidence) hrang hrangte erawh tun dinhmunah dan kenkawhte leh he thubuai chhui zelna tibuai thei tur a nih avangin la tarlan theih a ni rih lo.

He tualthahna hi investigation kal lai mek niin finfiahna (evidence) hrang hrang leh kaihhnawih thil te la chhuizui zel niin a tul angin thuchhuah siam zel a ni ang. Mipuite chu police hnuchhuitute hmalakna ngaichang zel tur leh mahni thu a hma la mai lo turin kan insawm a ni.