News

Vawiin (1.12.2025) hian Chief Minister Lalduhoma chuan a office-ah Mizoram Gorkha Mandir Sanchalan Samiti, Bazar Branch te a kawm a, Canteen Kuala awm Hari Mandir chungchang a sawipui.

Mizoram Gorkha Mandir Sanchalan Samiti, Bazar Branch hruaitute chuan Prime Minister hnena lehkha an lo thehluh tawh, Hari Mandir humhalh zui tura an dilna chu, Mizoram hmasawnna an ngaihpawimawh vanga an sut thu Chief Minister hi an hriattir. Prime Minister hnena an lehkhathawn copy pawh Chief Minister hi an hlan nghal a ni.

Hetih lai hian he Hari Mandir hi Aizawl khawpui lailia veng 11 lawina a nih avang leh Hari Mandira an bungraw thianghlimte dah zuina tur an mamawh avangin an inkhawm zui zelna tur hmun sorkarin ngaihtuahsak se an duh thu an thlen nghal a ni.

Chief Minister hian, Mizoram Gorkha Mandir Sanchalan Samiti hruaitute chungah hian lawmthu a sawi. AR ram chhuahsan enkawl zuina hi Advisory Commmittee kuta awm a nih avangin Hari Mandir sawnna tur chu ngaihtuahho a tul tur thu a lo hrilh. “A sawn theihna tur hmunhma remchangte pawh dap tlang ila, a tul angin kan sawiho zel dawn nia” tiin a chah a ni.

AR ram Advisory Committee chuan NGO Coordination Committee-te chu Hari Mandir chungchangah Samiti hotute titipui turin an ngen tawh a, an report pawh Advisory Committee hnuhnung berah khan an pe tawh. An inkawmna kal zelah Samiti hruaitute hian Chief Minister hi an rawn hmu ta a ni.