Health Minister damdawi in pahnih a tlawh

Vawiin (27.6.2026) hian Health Minister Lalrinpuii chuan Kolkata-a MUHCS empanelled hospital, Mizo damlo refer tamna – Natralaya RN Tagore Hospital leh Manipal Hospital, EM bypass Road a mite chu a tlawh.

RN Tagore Hospital lung lam leh kal thlakna lama damdawi in experiance nei tha tak niin, Civil Hospital, Aizawl a kidney transplant Kan kalpuina tura min puitu hospital an ni. Tunah hian Civil Hospital, Aizawl doctor leh staff-ten training thawhkhatna an nei zo tawh a, training thawhhnihna neih leh tum mek a ni.

Health Minister chuan damlo refer-te lo enkawl mai bakah Tagore Hospital leh Mizoram damdawi inte chuan Mizoram Sawrkar damdawi in tihchangtlunna tura hmachhawp hrang hrangah thawhhona tam zawk neih a duh thu a sawi a, damdawi in a awm mek Mizo damlote pawh harsatna an neih leh neih loh zawtin, a an nghal a ni.

Damlo boral palh an awm a, death certificate pek chhuah muang deuh hlek thin pawh a rang thei anga pe chhuak turin Tagore Hospital hotute chu a ngen nghal a ni.

Hemi hnu hian Manipal Hospital, EM Bypass Road, Kolkata a tlawh leh. He hospital hi cancer lamah super speciality hospital niin, khawl thar tha ber berte nena thuam an nih avangin cancer enkawlna kawngah chuan an rintlak thu Health Minister hi an lo hrilh. ICU leh radiation wing-te a tlawh nghal bakah damlo inenkawl mekte pawh kan nghalin, harsatna an neih leh neih loh te a zawt nghal.

Manipal Hospital hotute pawhin an hospital hrang hranga damlo an enkawl dan te, super speciality branch hrang hrang an neihte an lo hrilhfiah a, damlote chu theihtawp chhuaha an lo enkawl thin thu sawiin, theihtawp chhuah chhunzawm zel an tum thu an sawi.

Health Minister chuan Mizoram chhunga nursing college hrang hranga campus recruitment neihpui atan a sawm nghal a, anni pawhin Manipal Hospital hrang hranga thawk turin Mizo nurse tam zawk thawktu atana mamawh thu an lo sawi a ni.

Health Minister hi Dr Lily Chhakchhuak, Director; Directorate of Health Services, Zoremthara Ralte, Joint Resident Commissioner leh H. Lalhruaitluanga, PS to Minister in an tawiawm a ni.