Health Minister-in damdawi-in a hawng

NABARD RIDF sum cheng nuai 601.34 senga sak Sub-District Hospital, Tlabung building thar chu vawiin (12.5.2026) hian Health Minister Lalrinpuii’n a hawng.

Health Minister chuan mipuite’n ṭangkai zawka damdawi in an chhawr theih nan a enkawlna leh inrelbawlna (management) lam a pawimawh hle tih sawiin, “Natna zawn chhuah hna thawktu laboratory lam te, damlo enkawltu nursing lama thawkte leh doctor te, eirawngbawltu bakah a tifaitute thlenga ṭha tak leh inpawh taka an thawh ho a ṭul hle,” a ti.

Lalrinpuii chuan Mizorama doctor indaih lohna zualpui phuhruk nan MBBS 20 leh BDS 5 lakna tur thil pawimawhte hmanhmawh taka buaipui mek a nih thu sawiin, “Mipuite’n an chhawr ṭangkai zawk theihna tura district hospital, sub-district hospital, CHC, PHC leh medical college-te tihchangtlun chhoh zel tum a ni,” tiin damdawi ina thawkte chu damlote chu taksa damna tluantling an pe thei lo a nih pawhin rilru damna pek tuma theihtawp chhuah ṭhin turin a fuih.

Sub-District Hospital, Tlabung hawn inkhawmah hian Bialtu MLA Prova Chakma leh Health Secretary K Lalrinzualite pawhin thu an sawi.

Sub-District Hospital Tlabung hi khum 30 awmna niin, a sakṭhatna tur hian NABARD RIDF XXIX 2023–2024 hnuaiah a zavaiin cheng nuai 601.34 ruahman a ni. He damdawi in sak ṭhat hna hi Zothan Consultancy Services te’n thawkin, January 20, 2025 aṭanga hna ṭanin, February 3, 2026-ah an zo. A chhuat awh zau zawng hi square metre 824.73 niin, chhawng hniha sak a ni.

A chhawng khatnaah hian general ward, nursing station, X-ray, operation theatre, ultrasound leh endoscopy bakah, laboratory leh nau neihna pindan te awmin, a chhawng hnihnaah hian damlo awmna general ward bakah, nursing station leh inthiarna hmunte dah a ni.