Health Minister-in ngaihdam a dil

Vawiin (16.3.2026) a MUHCS 2.0 hawn inkhawm Assembly Annexe Conference Hall-a neihah Health Minister Lalrinpuii chuan F Lallawmkimi (31) w/o PC Lalrempuia, Zobawk North raicheha a thih chungchangah ngaihdam a dil.

Health Minister chuan F Lallawmkimi chhan hrang hrang vanga Civil Hospital, Lungleia nau nei tura kal enkawl theih a ni loa, thihna hial a thleng chu pawi a tih thu sawiin, “Min ti lungngai em em a, lusun chhungte ka tawrhpui takzet,” a ti.

Khum a awm lo tia F Lallawmkimi hnar a ni chuan a rilru a tihnat thu sawiin Lalrinpuii chuan, “Tanpui ngai tanpui thei loa ka department an awm hi a lungchhiat thlak ka ti takzet,” a ti a, minister a nihna anga ngaihdam a dil thu a sswi.

Health Minister sawi danin, he thil thleng hi dan anga chhui a ni a, preliminary inquiry zo tawhin, magisterial inquiry neih dan tur ngaihtuah mek a ni.

F. Lallawmkimi (31), Pu PC. Lalremruata nupui Lunglei Zobawk Venghlun chu March 12 khan Lunglei Civil Hospital-ah a inentir a, a inentir zo chu Lunglei Police Thanna bul thingpui dawra an chawlh laiin a inthiar a, hetah hian nau a hrin avangin a hnu deuhah a thi zui.

Lunglei atanga thu dawn danin, F. Lallawmkimi hi Lunglei Civil Hospital OPD-ah a inentir a, a ke a vun avangin doctor-in a lung endik turin a ti a, Cardiocologist Doctor a lo awm loh avang a inentir thei lova, an inentir zo hi thil eng eng emaw lei turin an vak kual a, Lunglei Police Thanna bul thingpui dawra an chawl laiin inthiar a duh thu a sawi a, a inthiarna lamah hian nau a hring a ni.

Hetianga nau a hrin avang hian amah hruaitute chu Lunglei Civil Hospital-ah kalin thil awm dan an hrilh a, Hospital-a duty te chuan khum a ruah loh thu leh an admit theih loh thu an lo hrilh avangin mitlawmngaiten lirthei remchang hmangin John Williams Hospital an panpui a,tlai dar 3:30-ah John Williams Hospital hi an thleng a ni. John Williams Hospital-ah hian Gyanae Doctor a lo awm remchan loh avangin Doctor chuan Lunglei Civil Hospital lam biak sakin, lo buaipui tura a ngen angin tlai dar 5:30-ah Lunglei Civil Hospital hi panpui a ni a, hemi hnu rei loteah Pi F. Lallawmkimi hi biak theih lovin a awm zui a, tlai dar 6:35-ah a thi chatthla zui a, a thihchhan hi Sudden Cardiac Arrest (SCA) niin Doctor-te chuan an sawi.

F. Lallawmkimi naupai hi a hrin hun tura chhut lawk chu April ni 17 a ni a. A ruang hi nizan khan lumen niin, vawiin chawhma dar 11 khan vui liam a ni.

F. Lallawmkimi fa hrin hi mipa a ni a, kg. 2.700 a rit niin, tunah hian NBCU-ah enkawl mek a ni a, a dinhmun a ngaihtuah awm lo ni-a sawi a ni.