Heroin leh ganja an man

Tunhnai khan Central Anti-Drug Squad (CADS) leh Excise Drpartment tangkawp chuan heroin leh ganja thahnem tak an man a, mi pathum an man tel.

CADS atanga thudawn danin, March 6, Zirtawpni zan khan CADS leh Excise-te chuan Republic Venga Vety Peng-ah heroin inpek am tum lai an nangching a, Laldingpuii (36), Lunglei Lunglawn Veng mi nia insawi chu man tel a ni.

Laldingpuii hi December 22, 2023 khan Lunglei Police, District Special Branch-ten heroin hawng 50 (601.14 grams) an lo mansak tawh, thubuai la nei lai a ni tih hriat a ni.

Laldingpuii hian a tirah Republic Vety peng chhak luikawrah a thuhruk thu a sawi avangin dap fe a ni. Mahse, engmah hmuh tur a awm loh hnuah an in, Ramhlun Sports Complex-ah kalpui a ni ta zawk a; an bedroom-a pheikhawk bawm atangin heroin hawng 11 an man ta a ni.

March 7, 2026, Inrinni zan khan Zemabawk-ah Shillong atanga Ganja rawn phur chho thin maxi cab pahnih registration no. ML 05 L 5039 leh ML 05 Q 6270 te atangin CADS leh Excise-te chuan ganja 8.394kg an man.

Ruihhlo phurtu sumo khalhtute:

1.Bulpa Halam (29) s/o Bubu Halam, Dholai, Silchar, Assam.

2.Lalsangpuia (29) s/o Nil Mohan, Dholai, Silchar, Assam. te chu man an ni a, thubuai siamsak nghal an ni.

Central YMA Treasurer leh CADS Convener ni bawk H. Duhkima chuan, “Kan hnam hmelma ruihhlo do beihpui chu Central YMA-in kum hnih chhung awh turin a puang. He ruihhlo dona beihpui hi hlawkthlak taka kalpui a nih theih nan Central leh Zone hrang hrangah ruihhlo do tur hian, ‘Sipai Rual’ thahnem tak ruat an ni a, he hna thawk tura tlawmngai taka inpe-te hi ‘Hnam Sipai’ tih loh rual an ni lo. Heng ‘Hnam Sipai’ mi tlawmngai tak takte hian heroin leh ruihhlo tam tak a zuartute hnen atangin an man chhuak mek a, sim duh hauh lote chu thubuai siamsak bakah TBCC lamah dah luh thin an ni,” a ti.