News

Bawngkawn Police, Special Anti Narcotics Team leh Assam Rifles tangkawp chuan nimin (30.7.2026) khan Seling Zero Point-ah super carry van atang leh a khalhtu hnen atangin heroin ni ngeia hriat thahnem tak an man.

Dan kengkawhtute hian Zoramchhana (19), Champhai Dinthar nia inchhal khalh super carry van MZ 04/B – 1215 chu lo ti dingin an endik a, tool box-a thuhruk sahbawn bawm pakua-a dah heroin ni ngeia hriat hmu chhuakin an man a, a hnuah taksaa a thuhruk sahbawn bawm pakhata dah heroin ni ngeia hriat an man leh.

Heroin ni ngeia hriat hi a vaiin grams 112.339, cheng nuai 22.46 man hua chhut a ni.

Motor khalhtu Zoramchhana thu an zawhfiahna atangin heroin ni ngeia hria hi Chhani, Khawmawi, Myanmar-in Lalnunziri, Aizawla cheng hnena pe tura a thawn a ni. Chhuizui niin herioin nia hriat lo dawngsawng tura hriat Lalnunziri (36), Tinghmun khua, Chaltlang Ruam Venga cheng leh a thiante Lalremruati (39), Ramhlun Vengthar nia inchhal leh Lalduhlkima, Durtlang Leitan nia inchhalte chu an man leh a ni.

Heng mi pathumte sawi danin, heroin nia hriat hi Lalthakimi, Sunhluchhip tuna Zemabawka cheng hnena hlan chhawn leh tur, Aizawla zawrh tur a ni.