High Court-in MHCS writ pettition a ngaihtuah

Ni 22.4.2026 (Nilaini) khan, Gauhati High Court, Aizawl Bench chuan Mizoram State Health Care Society (MHCS) te writ petition thehluh chu a ngaihtuah. He thubuai hi State Chief Information (CIC) Commissioner, Mizoramin ni 9.04.2026-a RTI hmanga D?Synod Hospital leh Mizoram Sawrkarte inremna pe chhuak tura a thupek atanga lo awm a ni.

CIC hian dilna siamtu J. Malsawmzuala Vanchhawng in a thil hriat duh a dilte chu a thlawna pe tur leh hun tiam chhunga pe ngei turin thuneitute a lo hriattir a ni. He thupek hi MHCS-te chuan dan kalh a nih thu leh thuruk vawnna (confidentiality) leh Right to Information Act, 2005-in a phutna te palzutna a nih thu sawiin, an khing let a ni.

Court hmaah petitioner-te chuan Synod Hospital, Durtlang nen inremna (agreement) an neih thu an sawi. Inremnaah hian thuruk vawnna clause khauh tak a awm a, damlo inenkawlna chungchang report leh an chanchin hrim hrimte chu thuruk anga vawn tlat tur a nih thu a chuang. He hriatpuina hi thuneitu pahnihte hriatpuina leh remtihna (written consent) lo chuan midang hnenah pek chhuah phal a ni lo bawk.

He clause behchhan hian SPIO pawhin a hmain hriat duh tarlante hi pek a lo hnar tawh a ni.

Nimahsela, he thil hi State Chief Information Commissioner hnen a thlen a nih hnuah, CIC chuan tarchhuak turin thupek a chhuah ta a ni. Petitioner-te hian ni 17.04.2026 khan he thuthlukna hi ennawn leh turin dilna an siam a, mahse ngaihsak a ni lo. High Court hmaah hian Advocate General chuan Commissioner hian Right to Information Act-a Section 19(4), “third party”-te hriatpuina leh thu sawina hun pek tur tih chu a zawm lo tih a tarlang. Chutih rualin, Act-a Section 19(9) pawh zawm a ni lo tih a sawi bawk.

Thil awmdan hrang hrangte a ngaihtuah hnuah, High Court chuan respondent-te hnenah in sawi fiah turin hun a pe a, kar thum chhunga chhanna pe turin a hriattir a ni. Petitioner-te pawh ni thum chhunga notice hi hlan (serve) turin a hrilh bawk. Court chuan ni 9.04.2026-a Commissioner thupek chhuah chu a “stay” (titawp rih). He thubuai hi ni 18.05.2026-ah ngaihtuah leh turin tih a ni. Hetiang ang thubuai sawrkar leh sawrkar inkhinna hi thil thleng khat tak a ni.

Source – www.jclalnunsanga.in