High Court-in MSIC order a sut

August 17, 2026 (Thawhtanni) khan Gauhati High Court, Aizawl Bench chuan Mizoram State Health Care Society (MSHCS) hnena Synod Hospital, Durtlang nena MUHCS chungchanga an inremna leh a man bithliah dan RTI Act hmanga tlangzarh tura Mizoram State Information Commission (MSIC)-in thupek a chhuah tawh chu a thiat a, MSIC chu Synod Hospital (third party) hnena insawifiahna hun siamsak a, an chhanna ngaithlak anih hnuah , thupek thar chhuah leh turin a hriattir a ni.

He thubuai hi RTI Act kaltanga MSHCS leh Synod Hospital-te, MUHCS chungchanga an inremna lehkha leh a man an bithliah dante hrilh tura dilna atanga lo piang a ni. MSHCS chuan he inremna lehkhaah hian confidentiality clause a tel avangin chhanna hi an pek chhuah theih loh thu an sawi.

Amaherawhchu, MSIC chuan ni 9.04.2026 khan MSHCS chu RTI Act kaltlanga zawhna te a thlawna chhanna pe turin thu a pe thung. MSHCS chuan he thupek hi High Court-ah khingin, heng zawhna chhanna hi inremnaa confidentiality clause a awm avangin, pek chhuah theih a nih loh thu leh Synod Hospital-te chu insawifiahna hun pe loin State Information Commission hian thupek an chhuah thu an thlen.

Court chuan Synod Hospital hi RTI Act hnuaia Section 2(n)-ah, RTI diltu nen mi hrang an nih avangin “third party” a nih thu a sawi a, Section 11 leh 19(4)-te hi zawm ngei tur a nih thu leh, heng confidential information-te hi tlangzarh a nih hmain third party-te chu hriattirna leh insawifiahna hun pek tur a ni tih a tarlang.

Tin, he dan hi thubuai ngaihtuahnaah, thubuaiin a nghawngte chu ngaihthlak ngei tur a ni tih a innghat a ni.

Court chuan inremna thuthlungah hian mipuite sum leh sorkar health scheme a tel avangin, lang tlang taka thil tih hi mipuite tan a pawimawh em em a ni tih a hmu a ni. Chuvang chuan, confidential a nih vang leh sumdawnna thila thil pawimawh a nih vang ngawta puanchhuah theih lohva siam ringawt chu a theih loh.

Hetiang a nih rual hian, MSIC hian Section 11 hnuaia zawm tura dan a siam te hi a zui ngei ngei tur a ni a, Synod Hospital hnenah insawifiahna hun a pe ngei tur a ni bawk. Hetiang anga hmalak a nih tak si lohvah chuan MSIC thuthlukna hi a ding chang thei ta lo a ni.

Chuvangin, High Court chuan MSIC order hi sutin, third party hnenah notice thawna, dan anga thuthlukna thar siam leh turin a thawn kir leh ta a ni.

Source :
www.jclalnunsanga.in