High Court-in ram chungchang thubuai a ngaihtuah

Tunhnai (17.3.2026) khan Gauhati High Court, Aizawl Bench chuan New Capital Complex – Chawnpui kawn kawngpui sira ram chungchanga thubuai a ngaihtuah leh. He thubuai hi Justice Nelson Sailo thutna bench-ah ngaihtuah a ni.

Advocate on Record Supreme Court JC Lalnunsanga tarlan danin, High Court chuan thutlukna dik leh felfai siam a nih theih nan Land Revenue & Settlement Department atanga chhanna (response) lak a ngai tih an sawi. Additional Advocate General ngenna angin, Court chuan counter-affidavit file nan kar thum chhung hun a pe. He thubuai hi April 20, 2026-ah ngaihtuah leh tura tih a ni a, chumi hma zawng chu ‘interim order’ lo chhuah tawh chu hman chhunzawm a ni ang.

Thubuai thehluttute hi inhlawhfa, rawra chhua eizawng an ni. An sawi danin, kum 2014 atang khan New Capital Complex-Chawnpui Kawn kawngpui sira ram awl chu rei lote chhung atan an lo luah tawh a ni. Hun a kal hnuah thlam te sa-in, a hnuah Assam Type-in an sa chhunzawm a, kum sawm dawn helai hmunah hian an cheng tawh.

He ram hi kum 1985 khan respondent (lehlam pawl) hmingin Land Settlement Certificate (LSC) siam a lo ni tawh. Mah se, kum 2002 khan Mizoram Sorkar chuan kawng siam nan he ram thenkhat hi a la a, respondent no. 5 hnenah hian zangnadawmna Rs. 2,20,948/- a pe tawh a ni. Kum 2014 khan sorkarin ram a lak tawh bak zawng atangin LSC No. Azl 3194/1985 thar (modified) pawh siam a ni.

Ram neitu hian kum 2019 khan ‘Eviction Suit No. 4/2019’ thehlutin, thubuai thehluttute hi phalna lova ram luahtu an nih thu a sawi. February 26, 2020 khan court chuan ram neitu hi thiam a chantir.. Chumi hnuah Execution Case No. 52/2020 file a ni leh a, October 30, 2025-ah court chuan a lo pawmpui leh a ni. Heng thutlukna hmasa te hi bumna hmanga lak a ni tiin, petitioners-te hian Article 226 hnuaiah High Court-ah an zualko a, heng court thutlukna te hi thiah an dil ta a ni.