Hlakungpui Mualah sengluh belh dawn

Mizo thu ziak mi leh hla phuah thiam thlanchhuah bikte hriatrengna lungphun Mizo Hlakungpui Mual chu kum kalta 2025 chhung khan mi 6,915-in an tlawh a; kumin April thla khian Mizo Hlakungpui Mualah hian Mizo thu ziak mi 4 leh hla phuah thiam mi 2 sengluh belh an ni dawn.

Champhai District chhung Khawbung khuaa Hla Kungpui Mual hi kum 1986 khan Mizo hlaphuah thiam Patea leh Damhauva te hriatrengna lung phun a bultan niin, kum 10 dan zelah thu leh hla lama thawhhlawk boral tawh zinga thlan chhuah bikte chu a ni bi kima an thih ni atanga kum 5 tling chinte sengluh thin an ni.

Tunah hian Hlakungpui Mualah hian thu ziak mi 15 leh hla phuah thiam mi 21 hriatrengna lung phun a ni tawh a; kumin April 8 leh 9 khian Mizo zinga thu ziak mi pali – Capt. LZ Sailo, Rev. Zairema, Khawlkungi leh Lalhmingliana Saiawi bakah hla phuah thiam pahnih – Hrawva leh Lalmama te chu Hlakungpui Mualah hian seng luh an ni dawn.

Hlakungpui Mual hi puitling tan luh man Rs. 20 a ni a; kum kalta 2025 chhung khan Hlakungpui Mual hian tlawhtu mi 6,915 neiin, an zinga mi 11 hi ramdang mi (foreigner) an ni a, India ram state dang mi 16 an awm bawk.