Nov 24, 2025
Monday
Nizan (23. 11. 2025) zan dar 11:50 vela E. Lungdar leh Biate inkar, E. Lungdar aṭanga kms. 1½ velah truck a chesual a, hliam tuar chu East Lungdar PHC-ah a thi.
Tarlan tawh angin, truck-ah hian mi pahnih chuangin, motor neitu leh driver ni bawk, Lalrinthanga (33) s/o Zodinthanga Champhai Zotlang chu chetsualna hmunah a thi. 2nd driver Rualthanchama (31 vel) s/o Thanglawra, Champhai Zotlang chuan hliam na tak tuarin E. Lungdar PHC-ah dah luh a ni.
Rualthanchama hian tukin dar 7:30 khan a hliam tuar loin a thi. Truck hi Champhai lam aṭanga kal a ni a, kawngthlangah tlan liamin, metre 150 vel a lum.
Lalrinthanga leh Rualthanchama ruang hi Champhai Zotlang panpui an la ni loa, he thuziahlai hian an chhungte nghah mek a ni.
Chhiattawhna thleng hi East Lungdar V/C leh YMA hruaituten an hriat veleh a hmunah kalin, ṭanpui hna an thawk nghal. Accident thlenna lai hi ram a chheng chhiain, chet vel a harsa hle. YMA hruaitute leh ṭhalai rual eng emaw zat phone call hmanga inkai thoin, hliam tuar leh ruang lakchhuah hna hi an thawk a ni.
He chhiat tawhna thleng chungchangah hian an bungraw phurh senghawi leh thildangah ṭanpuina hna thawh ngai a la awm zui zel dawn a, khawtlang hruaitute thu lo ngaichang zel turin East Lungdar mipuite an in ngen.
