News

MNF chuan thuchhuah siamin, MNF Ministry-in Hlimen Playground changtlung leh rotling, harsatna hrang hrang karah playground ṭha an neih ngei theihna tura theihtawp a chhuah luihna zarah vawiin (21.5.2023) ah hawn theih a lo ni ta tih tarlangin, “MNF chuan lawmawm a ti a,Hlimen khawtlang mipuite leh a chhehvela mipuite, a bikin ṭhalai infiammiten an chhawr ṭangkai ngei theih nan leh, Mizote hming chhertu tur ṭhalai tam tak chherchhuahna hmun a nih ngei theih nan duhsakna kan hlan a ni,” an ti.

Hlimen Playground chu Aizawl Smart City hnuaiah cheng vaibelchhia 6.81 a sak tura bul \an, MNF Ministry hunah Dy. Chief Minister Tawnluia’n March 23, 2023 khan lungphum a phum a nih thu tarlangin MNF chuan, “Playground siamna tur agreement hi December, 2021 ah siam niin kum 2022 ah hnathawh bul ṭan a ni thung,” tiin khatih laia Bialtu MLA Prof. F. Lalnunmawia’n theihtawp a chhuahna te, Hlimen Games & Sports Association leh khawtlang hruaitute’n theihtawp an chhuahna infawkkhawm leh UD&PA Minister hlui Tawnluia hmalakna leh tumruhna zarah Hlimen leh a chhehvela chengte’n a an awh em em playground chhenfakawm tak, ṭhangthar lo la awm zel turte tana rotling tur puitlin a lo ni ta lawmawm an tih takzet thu an tarlang.

MNF chuan Mizorama Football Stadium ṭha ber Durtlang Football Stadium, international standard cheng vaibelchhe 22.3 hu chu March 17, 2026 khan hawn a lo ni tawh tih tarlangin, “Hawn hmabak Mizo High School Field Playground (Multipurpose Ground at High Field, Zarkawt) te leh thawh mek Zemabawk Playground leh playground hrang hrang a la awm. Mizo ṭhalai infiammite tana sorkar hmasa MNF Ministry hnathawh leh hmalakna hrang hrangte hi MNF chuan chhuanawm a tiin, heng playground leh stadium ropui tak takte hi ram mipuite leh ṭhalai infiammiten an chhawr ṭangkai kim theih hun a nghakhlel em em,” tiin project kal lai mekte pawh ṭha taka thawh zawh thuai a nih theih nan state sorkar lai chu theihtawp chhuaha thawk chhunzawm turin an chah.