News

Vawiin (28.1.2026) chawhnu khan Home Minister K.Sapdanga leh I&PR Minister B. Lalchhanzovate chuan Home Minister office-ah Republic Day, 2026 lawmna inkhawma chanchinbumite lungawi lohnate bawhzuiin Republic Day Organising Department zinga mawhphurhna pawimawh deuh latute Aizawl Deputy Commissioner Office, State Protocol Office leh Directorate of Information & Public Relations hotute an kawm.

Home Minister chuan Republic Day lawmna inkhawm leh ‘Governor’s At Home’ chungchanga chanchinbumite’n lungawi lohna leh harsatna an nei chu pawi a tih thu sawiin, “He thil thleng chungchanga ngaihtuah ngai leh ennawn ngaite sawiho a pawimawh avanga inkokhawm kan ni. Hun lo kal leh zel turah felfai zawka ruahmanna kalpui a nih theih nan a huaihawttu sawrkar official-te nen sawiho a pawimawh,” a ti.

IPR Minister B Lalchhanzova chuan chanchinbumite chu sawrkar hunpui leh pawimawh ti phuisuitu leh tizahawmtu nih thu sawiin, “Hetianga ruahmanna fumfe loh avanga harsatna an tawk hi a pawi. Chanchinbumite lungawi lohna an hriat rualin official lam thu leh hla hriat a pawimawh tel. A inchotuah zawng ni lova a zaizap zawnga indawr tawn a tul,” tiin that leh that inlawm tawn a, harsatna kan tawh kara hma kan sawn zawk theihna tur zawn thiam a pawimawh thu a sawi.

Vawiin thutkhawmah hian inpawh tlang taka sawiho a ni. Aizawl DC kaihhruaina hnuaiah Protocol Office leh Directorate of Information & Public Relations ten hun remchang hmasa berah MJA hruaitute kawma inpawh tlang taka sawihona neih tha an ti a, Republic Day leh Independence Day-ah media enclosure siam ziah tawh nise an ti bawk. Sawmna semchhuah chungchangah fimkhur lehzuala kalpui nise, an ti.

Official atangin I&PR Secretary Betsy Zothanpari Sailo, Aizawl DC Lalhriatpuia, State Protocol Officer Lalmuansanga Ralte, DIPR Joint Director pahnih – Mina Zoliani Joute leh Malsawmsanga leh DIPR Deputy Director Andrew H. Lalremruata te an tel a ni.