Hmeichhe thuam hmanga indeusawh kan duh lo

MHIP hruaitute chuan vawiin (6.8.2026) hian Aizawl Press Club-ah press conference neiin, tunhnaiah hmeichhe thuam hmanga indeuhsawhna a thlen thu sawiin, ” Politics-ah a ni emaw, eng thilah pawh ni se, kan in sawisa in, kan in deusawh duh anih pawhin, hmeichhe thawmhnaw hmanga tih a nih chuan, Hmeichhia te hi kan dam thei ngai dawn lo a, kan pawm thei lo,” a ti.

Hmanlaiin, Mizo mipa chu, ral leh sa hma-ah an zam ngai lo a, chhungkua leh khawtlang tana, thlamuanpuiawm leh mawhphurtu an ni thin tih sawiin MHIP hruaitute chuan, “Chunga mawhphurna hlen thei lo leh tlanchhiate chu, ‘pawnfen fentir tlak i nip tiin an lo sawi thin. Vawiinah erawh chuan, Mizo nunphung a lo dang lamin, ral leh sa, a hrin a hran a beih tur, a awm tawh lo. Chuvangin khang hunlaia, tawngkam hman te kha, vawiinah chuan hman emaw, a taka lanchhuah tirna chi a ni tawh lo hul hual a ni. Kan hnam, Mizo hnamin hmasawnna nasa tak a nei chho a, a bik takin, hmeichhiate ah, nasa takin hmasawnna a awm tawh a, hmeichhe thawmhnaw hmanga indeu-sawh hi tih loh tawp tur a ni. Politics-ah a ni emaw, eng thilah pawh ni se, kan in sawisa in, kan in deu-sawh duh anih pawhin, hmeichhe thawmhnaw hmanga tih a nih chuan, hmeichhiate hi kan dam thei ngai dawn lo a, kan pawm thei lo a ni,” tiin hmeichhe thuam hmanga, insawisak leh indeuna thleng tawh lo se an duhthu a sawi.

MHIP hruaitute chuan social media khawvelah kan cheng tih sawiin, “Hetianga Mizote kan insawisak a, kan inhmuhsit hian, keimahni mai ni tawh lovin, khawvel hmun tin a miten, an lo thlirin an lo hmu ve thei vek a, a pawi em em a ni. Mizo hmeichhe thawmhnaw mai ni loin, hnamdang hmeichhiate thawmhnaw thleng pawhin, nuihzatthlakah kan chhuah a, kan sawisa a, a hnam ang in kan mualphona a ni tih kan hriat a pawimawh hle mai. Hnamdang rilru thleng pawhin kan hliam tel thei a ni. Thangthar zawkte phei chuan an hrethiam tawh lo a ni. Sim hmak chi a ni a, mitin I fimkhur zel ang u. Mizo hmeichhe incheina, pawimawh leh zahawm ber chu puanbih hi a ni. Mizo puan, a bikin sorkarin, dan hnuaia a humhalh, GI Puan – Puanchei, Tawlhlohpuan, Hmaram, Ngotekherh leh Pawndumte hi a hmanna tur dik tak leh a hman lohna turte, sorkar hian a ti chhuak a, zawm a hlawh tha lo hle. Hmun tam takah Puanchei hi, ruang khuh nan ten kan la hmang. Tin, dawhkan han khuh nan emaw bang cheimawi nan te kan la hmang thin a, hei hi phal loh a ni. Sorkar in dan ang thlap a, Mizote ta a ni, tia a GI puan an nih vang a ni. Eng programah pawh dawhkan khuh nante, bang cheimawi nan te, kan hmang tur a ni lo. Heihi kan zawm hram hram a pawimawh hle mai,” an ti.